Қазақстанда кәсіпкерлерге мемлекеттік қолдау алу үшін әр мекеменің табалдырығын тоздырудың қажеті азаюы мүмкін.
Еліміздің бес өңірінде бизнестің мәселесін бір жерден қарап, оны шешуге дейін сүйемелдейтін жаңа орталықтар іске қосылмақ, деп хабарлайды DKNews.kz.
Премьер-министрдің орынбасары – ұлттық экономика министрі Серік Жұманғариннің төрағалығымен өткен Үкімет кеңесінде бизнесті қолдау және сүйемелдеу орталықтарын құру тұжырымдамасы таныстырылды.
Пилоттық жоба «Даму» қорының өңірлік филиалдарының базасында жүзеге асырылады.
Кәсіпкерге нақты не өзгереді?
Қазір бизнесті қолдауға арналған бағдарламалар мен құралдар аз емес. Алайда мәселе туындаған сәтте кәсіпкердің алдында басқа сұрақ пайда болады: нақты қайда бару керек?
Мәселен, қаржыландыру мәселесі бір ұйымның, салыққа қатысты сұрақ екінші мекеменің, жер немесе мемлекеттік қолдау тетіктері басқа органның құзыретінде болуы мүмкін. Соның салдарынан кәсіпкер мәселені шешуден бұрын оның қай мекемеге тиесілі екенін анықтауға уақыт жұмсайды.
Жаңа орталықтардың мақсаты – осы процесті жеңілдету.
«Даму» қорының басқарма төрағасы Фархат Сәрсекеевтің айтуынша, кәсіпкерлерге мәселені анықтаудан бастап, оны шешуге дейінгі бірыңғай сүйемелдеу тетігі қажет.
«Қолдау орталықтарын құру кезінде «Атамекен» ҰКП проблемалық мәселелер тізілімінен 2,4 мыңнан астам ШОБ өтінішіне талдау жасалды. Оның 600-ден астамы пилоттық жобаны іске қосу жоспарланған өңірлерден келіп түскен. Бизнес өтініштерінің негізгі бөлігі қаржыландыруға қол жеткізу, берешекті қайта құрылымдау, мемлекеттік қолдау шараларын алу, салық, өнімді өткізу, кәсіпкерлік құзыреттерді дамыту бойынша консультациялар туралы. Сондай-ақ сұраныстардың едәуір бөлігі АӨК секторына қатысты. БҚСО дәл осы бағытта жұмыс істейді. Бұл ретте орталықтардың тиімділігінің негізгі көрсеткіші өткізілген консультацияның саны емес, кәсіпкерлердің реттелген мәселелерінің үлесі болады», — деп атап өтті Фархат Сәрсекеев.
Бұл жерде маңызды бір өзгеріс бар: орталықтардың жұмысы қанша адамға кеңес берілгенімен емес, қанша кәсіпкердің мәселесі нақты шешілгенімен бағаланбақ.
«Бір терезе» қалай жұмыс істейді?
Жоба «бір терезе» қағидатына негізделеді.
Яғни күрделі жағдайға тап болған кәсіпкер мәселені қай мемлекеттік орган шешетінін өз бетінше іздеп жүрмеуі тиіс. Ол «Даму» қорының филиалы жанындағы орталыққа жүгініп, қажетті кеңесті сол жерден алады.
Мәселе басқа мемлекеттік органның немесе ұйымның құзыретінде болса, кәсіпкерді тиісті құрылыммен байланыстырып, өтінішті шешуге дейін сүйемелдеу көзделіп отыр.
Бұл тәсіл әсіресе мемлекеттік қолдау бағдарламаларын алғаш рет пайдаланатын шағын және орта бизнес үшін маңызды болуы мүмкін.
Орталықтар қай қалаларда ашылады?
Алғашқы кезеңде жоба бес өңірде сыналады:
- Астана;
- Алматы;
- Шымкент;
- Солтүстік Қазақстан облысы;
- Ақтөбе облысы.
Пилоттық кезең қыркүйектен желтоқсанға дейін жалғасады.
Осы уақыт ішінде орталықтардың кәсіпкерлер мәселесін қаншалықты тиімді шешетіні бағаланады. Нәтиже оң болса, жаңа модельді Қазақстанның барлық өңіріне тарату мәселесі қаралады.
Бизнес көбіне қандай мәселемен келеді?
«Атамекен» ҰКП деректеріне жасалған талдау кәсіпкерлердің ең жиі кездесетін проблемаларын да көрсеткен.
Олардың қатарында қаржыландыруға қол жеткізу, қарызды қайта құрылымдау, мемлекеттік қолдау шараларын пайдалану, салық мәселелері, өнім өткізу және бизнесті жүргізуге қажетті құзыреттерді дамыту бар.
Агроөнеркәсіп кешеніндегі кәсіпкерлердің өтініштері де аз емес.
Демек жаңа орталықтар жай ғана анықтама беретін кеңсе емес, бизнестің нақты проблемасын шешуге қатысатын алаң ретінде жұмыс істеуі тиіс.
Әртүрлі мемлекеттік органдар бір алаңда жұмыс істемек
Орталықтарды іске қосудың нақты механизмін әзірлеу үшін арнайы жұмыс тобы құрылады.
Оған мүдделі мемлекеттік органдармен қатар, құқық қорғау органдарының, қаржы реттеушілерінің және «Даму» қорының өкілдері кіреді.
Мұндай форматтың басты міндеті – кәсіпкерді бір мекемеден екіншісіне жіберуді азайтып, әртүрлі мемлекеттік құрылымдардың жұмысын бір жүйеге біріктіру.
Егер пилоттық жоба көздеген нәтижеге жетсе, Қазақстандағы бизнесті мемлекеттік қолдау жүйесінде жаңа тәсіл қалыптасуы мүмкін: кәсіпкерге бағдарламаны көрсетіп қана қоймай, оның нақты мәселесін шешуге дейін бірге жүру.
