Енді рейс кешіксе немесе тоқтатылса, жолаушы мәселені байланыс орталығынсыз шеше алады. FlyArystan жаңа цифрлық сервисті іске қосты: ол қолжетімді жағдайда жаңа ұшу уақытын растауға, басқа рейсті таңдауға немесе билет ақшасын қайтаруға өтінім беруге мүмкіндік береді, деп хабарлайды DKNews.kz.
Қызмет әуекомпанияның барлық жолаушысына билетті қай арнадан сатып алғанына қарамастан қолжетімді. Негізгі әрекеттер онлайн орындалады.
Рейс өзгерсе, хабарлама автоматты түрде келеді
Ұшуға 72 сағаттан аз уақыт қалғанда рейс кешіктірілсе немесе тоқтатылса, жолаушыға дербестендірілген хабарлама жіберіледі.
Ол билет сатып алу кезінде көрсетілген байланыс деректеріне:
- WhatsApp арқылы;
- электронды пошта арқылы жіберіледі.
Хабарламада рейстегі өзгерістер туралы негізгі ақпарат, соның ішінде бастапқы және жаңартылған ұшу уақыты көрсетіледі.
Сондықтан әуекомпания билет брондау кезінде нақты әрі қолданыстағы телефон нөмірі мен электронды пошта мекенжайын көрсетудің маңызды екенін ескертеді.
Бір сілтемеден барлық нұсқаны көруге болады
Хабарламада жолаушыға арналған бірегей сілтеме болады. Ол арқылы дербестендірілген веб-парақша ашылады.
Қосымша тіркелудің немесе қайтадан жеке деректер енгізудің қажеті жоқ.
Жүйе нақты рейсті, билетті және кестедегі өзгерістің сипатын ескеріп, сол жолаушыға қолжетімді әрекеттерді автоматты түрде ұсынады.
Жағдайға байланысты үш нұсқаның бірі немесе бірнешеуі қолжетімді болуы мүмкін:
- «Жаңа ұшу уақытымен келісу» – өзгертілген уақытты растау;
- «Ұшу уақытын ауыстыру» – қолжетімді балама рейсті таңдау;
- «Әуебилетті қайтару» – әуекомпания қағидаларында қарастырылған жағдайда ақшаны қайтаруға өтінім беру.
Осылайша, жолаушы байланыс орталығы операторының жауабын күтпей-ақ, сапарына қатысты шешімді өзі қабылдай алады.
Билет агенттіктен сатып алынса, ақша қалай қайтарылады
Дербестендірілген сервисті FlyArystan-ның барлық жолаушысы пайдалана алады. Алайда билет ақшасын қайтару тәртібінде айырмашылық бар.
FlyArystan-ның ресми сайты немесе мобильді қосымшасы арқылы билет сатып алған жолаушылар ақшаны қайтаруды цифрлық платформада тікелей рәсімдей алады.
Ал билетті турагенттік немесе онлайн-агрегатор арқылы сатып алғандар ақшаны билет алынған жер арқылы қайтаруы керек.
Рейс 5 сағаттан аз кешіксе не болады
Жаңа сервистегі мүмкіндіктер рейстің қанша уақытқа кешіккеніне де байланысты.
Егер рейс 5 сағаттан аз уақытқа кешіктірілсе, әуекомпания ережелері айыппұлсыз мәжбүрлі қайта брондау немесе билет ақшасын қайтару мүмкіндігін қарастырмайды.
Мұндай жағдайда цифрлық сервисте жолаушыға тек «Жаңа ұшу уақытымен келісу» опциясы ұсынылады.
Хабарлама келмеуінің бірнеше себебі бар
FlyArystan рейс өзгерген жағдайда жолаушыларға хабарлама жібереді. Бірақ оның дұрыс жеткізілуі брондау кезінде енгізілген деректерге байланысты.
Әуекомпания ұшатын жолаушының өзінің мобильді телефон нөмірін көрсетуге кеңес береді.
Хабарлама мына жағдайларда жеткізілмеуі мүмкін:
- телефон нөмірі қате көрсетілсе;
- электронды пошта мекенжайы дұрыс болмаса;
- жолаушы бұған дейін хабарлама жіберушіні бұғаттаса;
- FlyArystan хаттары спам ретінде белгіленсе.
Сондықтан билет сатып алу кезінде байланыс деректерінің дұрыстығын тексеру маңызды.
Жаңа сервис жолаушыға не береді
Рейс кешіккен немесе тоқтатылған кезде байланыс орталығына бір мезетте көптеген өтініш түсуі мүмкін. Жаңа жүйе қарапайым операциялардың бір бөлігін автоматтандыруға мүмкіндік береді.
Жолаушы өзіне қолжетімді нұсқаларды бірден көріп, шешімді бірнеше секунд ішінде онлайн қабылдай алады.
Бұл рейс кестесі өзгерген кезде мәселені шешуге кететін уақытты қысқартып, жолаушыға өз сапарын дербес басқаруға көбірек мүмкіндік береді.
FlyArystan алдағы уақытта да жолаушыларға арналған цифрлық қызметтер мен жаңа мүмкіндіктерді дамытуды жоспарлап отыр.
