Қазақстан жаңа саяси кезеңге қадам басты.
23 тамызда ел азаматтары алғаш рет Құрылтай депутаттарын сайлап жатыр. 145 депутаттан тұратын бір палаталы жаңа заң шығарушы органның қалыптасуы конституциялық реформадан кейінгі саяси жүйенің іс жүзінде жұмыс істей бастауындағы маңызды кезең саналады, деп хабарлайды DKNews.kz.
Сайлау барысын халықаралық байқаушылар да бақылап отыр. Солардың бірі – Әзірбайжан Орталық сайлау комиссиясының төрағасы Мазаир Магоммедоглы Панахов. Ол Қазақстандағы дауыс берудің ұйымдастырылуына және елде жүргізіліп жатқан саяси реформаларға қатысты пікір білдірді.
«Халық таңсәріден дауыс беруге келуде»
Мазаир Панахов Қазақстандағы сайлау процестерін бұған дейін де бақылаған. Оның айтуынша, елдегі сайлауға дайындық деңгейі дәстүрлі түрде жоғары.
Халықаралық сарапшы бұл жолы да сайлаушылардың таңертеңнен белсенділік танытқанына назар аударды.
«Қазақстанда әрдайым сайлауалды дайындық жұмыстары жоғары дәрежеде атқарылады. Соған сай бүгінгі Құрылтай сайлауы өте жақсы өтіп жатыр. Халық емін-еркін өз таңдауын жасап, таңсәріден дауыс беруге келуде. Бұл да мемлекеттің ішкі тыныштығы мен жүйесінің дұрыс қойылғаны дер едім», – деді Мазаир Панахов.
Оның бағалауынша, сайлау учаскелеріндегі қалыпты жағдай мен азаматтардың дауыс беруге еркін қатысуы саяси процесті ұйымдастыру деңгейін көрсетеді.
«Қазақстан үшін жаңа саяси бағыттың бастауы»
Әзірбайжан ОСК төрағасы Қазақстандағы қазіргі өзгерістерге кеңірек тоқталды.
Ол екі ел арасындағы тығыз қарым-қатынас 2000 жылдардың басынан бері жүйелі түрде дамып келе жатқанын атап өтті. Оның пікірінше, бүгінгі сайлау Қазақстанның саяси дамуындағы жаңа кезеңмен тікелей байланысты.
«Екі ел өзара меморандум келісімін де алғашқылардың бірі болып жасаған еді. Бүгінгі сайлау Қазақстан үшін жаңа саяси бағыттың бастауы болмақ. Сайлаудағы сіз бен бізге қарапайым болып көрінген дүниелер негізінен өте маңызды», – деді ол.
Қазіргі науқанның ерекшелігі – азаматтар жаңа саяси жүйе аясында алғаш рет Құрылтай құрамын қалыптастырып жатыр.
Әзірбайжаннан 16 байқаушы келген
Мазаир Панахов үшін Қазақстандағы сайлауды бақылау алғашқы тәжірибе емес. Ол бұған дейін де елдегі сайлау процестеріне халықаралық байқаушы ретінде бірнеше рет қатысқан.
Бұл жолы Әзірбайжаннан 16 байқаушы келген.
«Әзірбайжан мемлекетінен бас-аяғы 16 бақылаушы келдік. Біздің міндетіміз сайлау процесін бақылау, қалай өтіп жатқанын дұрыс сараптау. Әр учаскеде сайлау процесі тыныш әрі жақсы өтіп жатыр дер едім», – деді Әзірбайжан ОСК төрағасы.
Халықаралық байқаушылардың міндеті дауыс беру барысын ғана емес, сайлау рәсімдерінің ұйымдастырылуын және учаскелердегі жағдайды да бақылауды қамтиды.
Неліктен бұл сайлау маңызды
Құрылтай сайлауының мәні тек 145 депутатты таңдаумен шектелмейді. Бұл – конституциялық реформадан кейін қалыптасқан жаңа саяси модельдің негізгі институттарының бірін іске қосатын науқан.
Жаңа Құрылтайдың алдағы бес жылдағы жұмысы бірнеше бағытқа тікелей ықпал етеді:
- қабылданатын заңдардың сапасына;
- саяси партиялардың қоғамдық-саяси белсенділігіне;
- азаматтардың заң шығару процесіндегі өкілдігіне;
- мемлекеттік институттарға деген қоғамдық сенімге;
- саяси реформалардың іс жүзіндегі нәтижесіне.
Сондықтан 23 тамыздағы дауыс беру жаңа депутаттық құрамды анықтап қана қоймай, Қазақстанның жаңарған саяси жүйесінің қалай жұмыс істейтінін көрсететін жаңа кезеңнің басталуына айналып отыр.
