Алматыда Қазақстан Республикасының сақтандыру нарығын 2030 жылға дейін дамыту бағдарламасының таныстырылымына арналған дөңгелек үстел өтті, деп хабарлайды DKNews.kz.
Қазір нарықта зейнетақы аннуитетінің үш түрі бар: дереу, кейінге қалдырылған және бірлескен (ерлі-зайыптыларға арналған) аннуитет.
Соңғы жылдары бұл сегмент айтарлықтай өсті. 2026 жылдың басындағы дерек бойынша, қолданыстағы зейнетақы аннуитеті шарттарының саны 2021 жылмен салыстырғанда 2,5 есе артты, ал сақтандыру сыйлықақыларының көлемі шамамен 3,5 есе өсті.
Жасалған шарттардың жалпы саны 164 294-ке жетіп, олардың жиынтық сомасы 1 168 млрд теңгені құрады. Оның ішінде кейінге қалдырылған аннуитеттер бойынша 53 826 шарт 429,4 млрд теңгеге жасалған.
Сарапшылардың айтуынша, қазіргі зейнетақы аннуитеттері жүйесі салымшылардың жеке қажеттіліктерін толық ескере бермейді. Сонымен бірге олардың басым бөлігі өнімді сатып алуға қажетті жеткіліктілік шегіне жете алмайды.
«Осыған байланысты зейнетақы өнімдерінің екі деңгейлі архитектурасына көшу ұсынылады. Бірінші деңгей өмір бойы кепілдендірілген төлемдерді қамтамасыз ететін базалық өнімдерді қамтиды. Екінші деңгей инвестициялық құрамдас бөлік есебінен кірістілік әлеуетін арттыруға мүмкіндік беретін нарықтық шешімдерді көздейді», — деді ҚНРДА төрағасының орынбасары Нұржан Тұрсынханов.
Gov
Үш санаттағы өнімді енгізу жоспарланып отыр.
Кепілдендірілген аннуитет өмір бойы төлем жасауды және зейнетақы жинағы төмен азаматтарға атаулы қолдауды қарастырады.
«Инвестициямен байланысты (unit-linked) өнімде кепілдік болмайды, бірақ ол жоғары кірістілікке қол жеткізу мүмкіндігін береді. Ал гибридті өнім кепілдендірілген және инвестициялық бөліктер арасындағы теңгерімді ұсынады», — деді спикер.
Әлеуметтік тәуекелдерді төмендету үшін нарықтық өнімдер мемлекет тарапынан субсидияланбайды. Оларға жинақтары белгіленген шектен асатын салымшылар ғана қол жеткізе алады.
Сонымен қатар 2026 жылы зейнетақы аннуитеттері бойынша мұрагерлердің құқықтары кеңейтілді.
Бұған дейін аннуитет иесі қайтыс болғаннан кейін қалған қаражатты мұрагерлер ұзақ уақыт бойы ай сайынғы төлем түрінде ғана ала алатын. Енді олар ай сайынғы төлемдерді жалғастыру немесе қалған соманы бір жолғы төлеммен толық алу нұсқаларының бірін таңдай алады.
Бағдарлама аясында өнімдерді салыстыруға және олардың арасында бірыңғай цифрлық контур арқылы ауысуға мүмкіндік беретін инфрақұрылым құру да жоспарланған.
Gov
ҚНРДА мәліметінше, реформаларды іске асыру бойынша одан арғы жұмыс бастамаларды нарық қатысушыларымен кезең-кезеңімен келісу форматында жүргізіледі.
Негізгі шешімдер биылғы жылдың соңына дейін әзірленуге тиіс жаңа «Сақтандыру қызметі туралы» заң жобасында бекітіледі. Зейнетақы аннуитеттері бойынша ұсынылған барлық өзгерістерді қамтитын Сақтандыру нарығын дамытудың 2030 жылға дейінгі бағдарламасы 2026 жылғы қыркүйекке дейін бекітілуі тиіс.
