Астана жаһандық авиациялық форумды қабылдайды.
2026 жылғы 20–22 қазанда Қазақстан астанасы алғаш рет ИКАО-ның Қауіпсіздік апталығын өткізеді, деп хабарлайды DKNews.kz.
Форумда киберқауіптер, жасанды интеллект және қақтығыс аймақтарындағы азаматтық авиация тәуекелдері негізгі тақырыптардың біріне айналады.
Іс-шара Қазақстан Республикасы Көлік министрлігінің қолдауымен Тәуелсіздік сарайында өтеді. Форумға әлемнің түкпір-түкпірінен авиация әкімшіліктерінің басшылары, салалық ұйымдар мен халықаралық құрылымдардың өкілдері қатысады.
Астана әлемнің авиация басшыларын жинайды
Қазақстан бұған дейін авиация саласындағы өңірлік іс-шараларды өткізіп келсе, енді жаһандық деңгейдегі форумды қабылдауға дайындалып отыр.
ИКАО-ның Қауіпсіздік апталығы «Күрделі әлемдегі қауіпсіз аспан: баршаға арналған авиациялық қауіпсіздікті арттыру» тақырыбында өтеді.
Форумға ИКАО Кеңесінің президенті Тошиюки Онума мен ИКАО бас хатшысы Хуан Карлос Саласардың, сондай-ақ шет мемлекеттер мен халықаралық ұйымдардың жоғары лауазымды өкілдерінің келуі күтіледі.
Бұл Қазақстан үшін тек халықаралық іс-шара өткізу мәселесі емес. Астана азаматтық авиациядағы жаңа қауіптер мен оларды басқару тәсілдері талқыланатын жаһандық алаңға айналады.
Киберқауіптер мен жасанды интеллект авиация күн тәртібіне шықты
Азаматтық авиациядағы қауіпсіздік мәселесі енді тек әуежайдағы бақылау немесе ұшақтарды қорғаумен шектелмейді.
Сала цифрлық технологиялар мен жасанды интеллектінің жылдам дамуымен, кибершабуылдардың көбеюімен, пилотсыз ұшу аппараттарының таралуымен және қарулы қақтығыстардан туындайтын тәуекелдермен бетпе-бет келіп отыр.
Осыған байланысты форум қатысушылары авиацияның маңызды инфрақұрылымын қорғау, киберинциденттерге төзімділікті арттыру және жаңа технологияларға байланысты тәуекелдерді бағалау мәселелерін талқылайды.
Қақтығыс аймақтарындағы азаматтық авиацияның жұмысына да жеке назар аударылады. Мұндай жағдайларда мемлекеттер мен авиациялық ұйымдар арасындағы ақпарат алмасудың жеделдігі қауіпсіздік үшін шешуші мәнге ие болады.
Қазақстанның ИКАО стандарттарына сәйкестігі 95,7%-ға жетті
Қазақстан форумды авиациялық қауіпсіздік саласындағы жоғары көрсеткішпен қарсы алады.
ИКАО аудитінің қорытындысы бойынша еліміздің халықаралық авиациялық қауіпсіздік стандарттарына сәйкестік деңгейі 95,7% болды.
Осы көрсеткішпен Қазақстан әлемдегі үздік 20 елдің қатарына кіріп, Орталық Азияда көш бастап отыр.
Мұндай нәтиже Қазақстанға халықаралық форумда тек қабылдаушы мемлекет ретінде емес, авиациялық қауіпсіздік жүйесін жетілдіріп келе жатқан ел ретінде көрінуге мүмкіндік береді.
Дрондар мен авиациялық инфрақұрылымды қорғау талқыланады
ИКАО-ның Қауіпсіздік апталығы аясында тәуекелдерді басқарудың жаңа тәсілдері, инновациялар мен технологияларды енгізу, мамандар даярлау және авиациялық қауіпсіздік жүйелерін күшейту мәселелері қаралады.
Пилотсыз ұшу аппараттарына байланысты қауіптер де жеке бағыт ретінде талқыланады.
Цифрлық жүйелердің авиациядағы рөлі артқан сайын әуежайлар, авиакомпаниялар мен басқа да инфрақұрылым нысандары үшін киберқорғаныс мәселесі алдыңғы қатарға шығып отыр.
Форумдағы пікірталастар ИКАО-ның негізгі жаһандық бастамаларымен, оның ішінде Авиациялық қауіпсіздікті қамтамасыз етудің жаһандық жоспары — GASeP және тұрақты мониторинг жүргізілетін USAP-CMA бағдарламасымен байланысты өтеді.
Астанадағы талқылаулар 2027 жылғы конференцияға жалғасады
ИКАО-ның Қауіпсіздік апталығы 2027 жылы өтетін Авиациялық қауіпсіздік жөніндегі үшінші жоғары деңгейдегі конференцияға — HLCAS/3 дайындықтың маңызды кезеңдерінің бірі болады.
Сондықтан Астанада тек қазіргі қауіптер ғана емес, алдағы жылдары жаһандық авиациялық қауіпсіздік жүйесіне әсер етуі мүмкін басымдықтар мен тәсілдер де талқыланады.
Негізгі іс-шаралар 2026 жылғы 20–22 қазанда Астанадағы Тәуелсіздік сарайында өтеді.
Бұған дейін біз Қазақстанның авиациялық қауіпсіздік көрсеткіші бойынша әлемдегі үздік 20 елдің қатарына қалай енгені туралы жазған едік. Елдің ИКАО талаптарына сәйкестік деңгейі 95,7%-ға жетті.
