Huawei халықаралық ICT Competition 2026–2027 байқауы қарсаңында Қазақстанның 48 университетін қамтитын білім беру турын бастады. Студенттер мен оқытушыларға арналған кездесулер 8 қыркүйекте басталып, 14 қазанға дейін жалғасады, ал ұлттық алдын ала іріктеу қазанның соңында өтеді, деп хабарлайды DKNews.kz.
Huawei Technologies Kazakhstan мәліметінше, компания өкілдері кездесулерде байқауға қатысу шарттарын, іріктеу кезеңдерін және дайындық мүмкіндіктерін түсіндіреді.
Студенттер байқауға дайындық жолдарын біледі
Roadshow ақпараттық-коммуникациялық технологиялар бағытында білім алып жатқан студенттер мен оқытушыларға арналған. Кездесулер қатысушыларға ұлттық іріктеу басталғанға дейін байқау талаптарымен танысуға көмектеседі.
Huawei ICT Competition жыл сайын өтеді. Қатысушылар технологиялық білімін тереңдетіп, оны нақты тапсырмаларды орындау кезінде сынайды. Сондай-ақ өзге елдердің студенттерімен және сарапшыларымен тәжірибе алмасады.
Huawei Technologies Kazakhstan бас директоры Сун Ясюйдің айтуынша, университеттерді аралаудағы мақсат — қазақстандық студенттерді байқауға кеңінен тарту.
«Huawei ICT Competition студенттерге университет қабырғасында алған теориялық біліммен шектелмей, оны іс жүзінде сынауға мүмкіндік береді. Биыл Roadshow Қазақстанның 48 жоғары оқу орнын қамтиды. Осылайша біз байқау мүмкіндіктері туралы барынша көп студентке ақпарат беріп, олардың өз күшін сынап көруіне жағдай жасағымыз келеді. Қазақстандағы жас АКТ мамандарының әлеуеті жоғары екенін көріп отырмыз және олардың кәсіби дамуы мен халықаралық тәжірибе алмасуына көбірек мүмкіндік жасауды көздейміз», — деді Сун Ясюй.
Ұлттық іріктеу 30–31 қазанда өтеді
Университеттердегі кездесулер аяқталғаннан кейін байқау кезеңдері басталады. Ұйымдастырушылар мынадай кесте ұсынды:
- 2026 жылғы 30–31 қазан — ұлттық алдын ала іріктеу;
- 2026 жылғы 27 қараша — ұлттық финал;
- 2027 жылғы наурыз — өңірлік финал;
- 2027 жылғы мамыр — жаһандық финал.
Осылайша, студенттер алдымен қатысу тәртібі мен дайындық жолдарын біліп, кейін жарыс барысында өз дағдыларын көрсете алады.
Қазақстандықтар желілік технологиялар мен ЖИ бағытында жүлде алған
Huawei ICT Competition 2025–2026 маусымында қазақстандық студенттер Network Track бағыты бойынша екінші, ал AI Innovation бағыты бойынша үшінші орын иеленді. Біріншісі желілік технологияларға, екіншісі жасанды интеллект саласындағы инновацияларға арналған. Жаһандық финал Шэньчжэньде өтті.
Huawei жариялаған қорытындыға сәйкес, өткен маусым байқау тарихындағы ең ауқымдысы болды. Оған 100-ден астам ел мен өңірдегі 2 мыңнан астам жоғары оқу орнынан 220 мыңнан астам студент пен оқытушы қатысты.
Байқау Huawei-дің АКТ академиялары арқылы университеттермен жүргізетін жұмысын толықтырады. Екі бастама да мамандарды тәжірибе жүзінде даярлауға, заманауи технологияларды меңгеруге және халықаралық тәжірибе алмасуға бағытталған.
Биыл қатысуға ниетті студенттер мен оқытушылар 14 қазанға дейін жалғасатын кездесулерде қазан айындағы іріктеуге дайындық жөнінде компания өкілдерінен ақпарат ала алады.
Университеттермен ынтымақтастық қалай құрылғаны және студенттерге қандай білім беру бағдарламалары ұсынылатыны туралы Қазақстандағы Huawei АКТ академиялары жөніндегі материалымыздан оқуға болады.
