2026 жылғы 23 қыркүйекте Астанада OpenAI компаниясы ресми серіктес болған HackAlem AI халықаралық хакатоны өтеді, деп хабарлайды DKNews.kz. Ұйымдастырушылар үздік командаларға 100 мың доллар ақшалай жүлде, ал жобаларды әзірлеу мен жеңімпаздарды марапаттауға жалпы құны 1 млн долларлық OpenAI технологиялық ресурстарын бөлетінін жариялады.
HackAlem AI ресми сайтында 2 500 орын қарастырылғаны және тіркелу 19 қыркүйекте аяқталатыны көрсетілген. Қатысушылар Астанаға өздері келуге тиіс: хакатон қашықтан өткізілмейді.
1,1 млн доллар қалай бөлінеді?
Жарияланған жалпы сомаға ақшалай жүлде де, технологияларды пайдалану мүмкіндігі де кіреді. Ұйымдастырушылар сайтындағы бөлініс мынадай:
- 600 мың долларлық OpenAI API-токендері — хакатон кезінде шешімдерді әзірлеп, іске қосуға;
- 300 мың долларлық Codex қолжетімділігі — жобаларды әзірлеуге, сынауға және дамытуға;
- 100 мың долларлық OpenAI API-токендері — жеңімпаздарға;
- 100 мың доллар ақшалай жүлде — үздік шешім ұсынған командаларға.
Жеңімпаздарға берілетін API-токендері технологиялық ресурстарға арналған 1 млн доллардың құрамына кіреді. Ақшалай жүлдемен бірге жалпы қолдау көлемі 1,1 млн долларды құрайды. Бұл — әр командаға жеке берілетін сома емес, қатысушылар мен жеңімпаздарға арналған ортақ қор.
Командаларға қысқа уақытта идеяны жұмыс істейтін өнімге айналдыру міндеті қойылады. Әзірленетін шешімдер бизнес, мемлекет және экономиканың түрлі салаларындағы нақты мәселелерге арналмақ.
«Қазақстанда HackAlem AI хакатонын өткізу – еліміздің AI-экожүйесін дамыту жолындағы маңызды қадам. Біз Қазақстан мен өзге елдердің әзірлеушілеріне озық технологияларды игеріп, жаңа шешімдер әзірлеуге және оларды әлемдік нарыққа шығаруға толық жағдай жасап отырмыз. Басты мақсатымыз – Қазақстанды дарынды мамандар, технологиялар мен AI-инновациялар тоғысатын орталыққа айналдыру», – деді Қазақстан Республикасы Премьер-Министрінің орынбасары – Жасанды интеллект және цифрлық даму министрі Жаслан Мәдиев.
Қатысу үшін қандай талаптар қойылады?
Хакатонға Қазақстаннан және өзге елдерден 18 жасқа толған әзірлеушілер, студенттер, жас мамандар мен ақпараттық технологияларға қызығатын азаматтар қатыса алады.
Үміткерлердің бағдарламалық өнім әзірлеу мен технология саласында білімі немесе жұмыс тәжірибесі болуы керек. Өз дағдыларын жеке жобалары, прототиптері, қосымшалары не зерттеу жұмыстары арқылы растауға да болады.
IT, бағдарламалау, инженерия, технология, математика немесе цифрлық өнім дизайны бағыттарында оқып жатқан студенттер де өтінім бере алады. Соңғы 12 ай ішінде осы мамандықтар бойынша күндізгі бөлімде білім алған жас мамандарға да қатысуға рұқсат етіледі.
23 қыркүйекте Астанадағы хакатон алаңына жеке келу міндетті. Жол жүру, тұру және қалада болуға байланысты өзге шығындарды қатысушылар өздері өтейді.
Финалистер жобаларын 29 қыркүйекте таныстырады
Жарияланған бағдарламаға сәйкес, ашылу рәсімі мен хакатон 23 қыркүйекте өтеді. 24–28 қыркүйек аралығында қазылар алқасы мен техникалық сарапшылар ұсынылған шешімдерді бағалайды.
29 қыркүйекке Demo Day белгіленген. Бұл күні финалистер жобаларын қазылар алқасына таныстырып, жеңімпаздар жарияланады. Марапаттау рәсімі 1 қазанда AI & Digital Bridge 2026 халықаралық технологиялық форумының сахнасында өтеді.
Әлеуеті жоғары жобаларға әрі қарай дамып, серіктестермен бірге пилоттық сынақтан өту мүмкіндігі беріледі. Мұндай жұмысқа іріктелген командалар тартылады.
«Silkroad Innovation Hub үшін HackAlem AI аясында OpenAI-мен технологиялық серіктестік орнату – Қазақстан мен Орталық Еуразияның дарынды жастарына жаһандық AI-құралдарын қолжетімді ету жолындағы маңызды қадам. Мықты экожүйе әзірлеушілер, стартаптар мен технологиялық командалардың тек тамаша идеясы болғанда ғана емес, сондай-ақ оларға озық құралдар, сарапшылық қолдау және нақты міндеттер қолжетімді болғанда ғана қалыптасатынына сенеміз. HackAlem AI дәл осындай ортаны қалыптастырады: қатысушылар OpenAI технологияларымен жұмыс істеп, іс жүзінде қолдануға болатын AI-шешімдерді әзірлейді, сондай-ақ корпорацияларға болашақ пилоттық жобалардың негізіне айналатын командалар мен өнімдерді ұсына алады», – деп атап өтті Silkroad Innovation Hub негізін қалаушы әрі бас директоры Асет Абдуалиев.
Өтінімдер 19 қыркүйекке дейін қабылданады
Қатысушылар жоба әзірлеумен қатар, Қазақстаннан және шетелден келген мамандармен, стартап негізін қалаушылармен, жасанды интеллект саласының өкілдерімен таныса алады. Оларға HackAlem AI фирмалық сыйлықтары мен атаулы сертификаттар табысталады.
Ұйымдастырушылар мен серіктестер қатарында Қазақстан Республикасының Жасанды интеллект және цифрлық даму министрлігі, Astana Hub халықаралық инновациялық кластері, Silkroad Innovation Hub, AI & Digital Bridge, Blockchain & AI Technology Center және OpenAI бар.
Өтінімді HackAlem AI сайтындағы тіркелу нысаны арқылы беруге болады. Орын саны шектеулі, тіркелудің соңғы күні — 19 қыркүйек.
Шетелдік әріптестеріне ақпарат жолдағысы келетіндер үшін OpenAI серіктестігі мен HackAlem AI-ға қатысу талаптары туралы ағылшын тіліндегі материалымыз да жарияланған.
