Қазақстандық қой шаруашылығында төрт селекциялық жетістік ресми танылды. Түркістан, Жамбыл және Алматы облыстарында жүргізілген мемлекеттік апробациядан кейін «Байсары» тұқымының екі тұқымішілік сүлесі мен екі зауыттық қошқар желісіне патент берілді, деп хабарлайды DKNews.kz.
Сынақ барысында 10,8 мыңнан астам мал бағаланды. Олардың өнімділігі мен селекциялық көрсеткіштері тікелей асыл тұқымды шаруашылықтарда тексерілді.
Түркістан облысында 7,3 мыңға жуық мал тексерілді
ҚР Ауыл шаруашылығы министрлігінің бұйрығына сәйкес «Байсары» тұқымының селекциялық жетістіктерін АӨК-тегі мемлекеттік инспекция комитетінің мемлекеттік комиссиясы бағалады.
Жұмысты ғылыми сүйемелдеу және ұйымдастыру етті-майлы бағыттағы қой шаруашылығының республикалық палатасына жүктелді.
Түркістан облысында Түркістан тұқымішілік сүлесіне апробация Бәйдібек, Сайрам, Сарыағаш аудандары мен Арыс қаласының аумағында жүргізілді.
Бағалау бірнеше асыл тұқымды шаруашылықты қамтыды:
- «Нұрболат» шаруа қожалығы
- «Молшылық» шаруа қожалығы
- «Сиябанд» шаруа қожалығы
- «Қуаныш» шаруа қожалығы
- «Таукеев Н.М.» ЖК
- «МҰБАРАК АГРО» ЖШС
Бұл шаруашылықтарда жоғары өнімді 7,3 мыңға жуық мал басы тексерілді.
231 келілік «Миллион» рекордқа енген
Апробация аясында № 00452 «Миллион» және № 5042 «Депутат» зауыттық қошқар желілері де бағаланды.
«Миллион» желісінің негізін қалаушы қошқардың тірідей салмағы 231 келіге жеткен. Бұл көрсеткіш Қазақстанның рекордтар кітабына енгізілген.
Жалпы «Байсары» етті-майлы бағыттағы қой тұқымына жатады. Ересек қошқарлардың тірідей салмағы 140–180 келі болса, жекелеген мал 200 келіден асады. Ет түсімі 53–56 пайызды құрайды.
Жетісу сүлесінің 3,5 мыңнан астам басы бағаланды
Жамбыл және Алматы облыстарында Жетісу тұқымішілік сүлесінің 3,5 мыңнан астам басы апробациядан өтті.
Жамбыл облысында сынақ Қордай, Шу, Меркі және Т. Рысқұлов аудандарындағы «Алпамыс», «Биғазы», «Бексұлтан», «Әлижан», «Бақша-Сарай» және «Айбек» шаруа қожалықтарының базасында жүргізілді.
Алматы облысында бағалау Қарасай ауданы мен Қонаев қаласындағы «Нұр и К», «Қыдыралиев» шаруашылықтарында және «Ли В.А.» ЖК-де өтті.
Мұндай апробация малдың тек сыртқы белгілерін емес, шаруашылықтардағы нақты өнімділік көрсеткіштерін бағалауға мүмкіндік береді. Соның нәтижесінде селекциялық жетістіктің белгіленген талаптарға сәйкестігі анықталады.
Төрт селекциялық жетістікке патент берілді
Мемлекеттік сынақтар мен апробация қорытындысында төрт селекциялық жетістік ресми танылып, патент алды:
- Жетісу тұқымішілік сүлесі — № 1292
- Түркістан тұқымішілік сүлесі — № 1293
- № 00452 «Миллион» зауыттық қошқар желісі — № 1294
- № 5042 «Депутат» зауыттық қошқар желісі — № 1295
Мемлекеттік тану селекциялық жұмыстың нәтижесін ресми бекітіп қана қоймайды. Енді бұл генетикалық және өнімділік қасиеттерін «Байсары» тұқымын одан әрі жетілдіру кезінде жүйелі түрде пайдалануға мүмкіндік береді.
Қазақстанда мал шаруашылығындағы селекцияға назар күшейіп келеді. Бұған дейін біз елде асыл тұқымды мал шаруашылығын дамыту үшін жаңа қолдау тетіктері енгізіліп жатқаны туралы жазған едік. Мәселен, «50 млрд теңге және жылдық 5%: қазақстандық фермерлерге арналған жаңа қолдау шаралары» материалында асыл тұқымды мал шаруашылығына бағытталған «Игілік» бағдарламасы туралы айтылған.
