Жинақ үшінші жыл қатарынан өсіп келеді.
2026 жылы «Ұлттық қор – балаларға» бағдарламасының әрбір қатысушысына тағы 130,71 доллар есептелді, ал бағдарлама іске қосылған алғашқы жылдан бері қатысып келе жатқан балалардың жинағы инвестициялық табысты қоса есептегенде 370,56 долларға жетті, деп хабарлайды DKNews.kz.
Алайда бұл ақшаны еркін шешіп алуға болмайды. Қаражатқа бала 18 жасқа толғаннан кейін ғана қол жеткізе алады және оны тек тұрғын үй жағдайын жақсартуға немесе білім алуға жұмсауға рұқсат етіледі.
Қаражатты пайдалану жөніндегі соңғы деректерді Бірыңғай жинақтаушы зейнетақы қоры жариялады. 2026 жылғы 1 қыркүйектегі мәлімет бойынша, бағдарлама іске қосылғаннан бері 365 553 қазақстандыққа жалпы сомасы шамамен 76,11 млн доллар төленген.
Үш жылда бір балаға 370,56 доллар жиналды
Бағдарлама 2024 жылдан бері жұмыс істейді. Ұлттық қордың инвестициялық табысының бір бөлігін балаларға бағыттау идеясын Президент Қасым-Жомарт Тоқаев 2022 жылғы Жолдауында ұсынған.
Бағдарлама Қазақстанның кәмелетке толмаған азаматтарын қамтиды. Қаражат жыл сайын есептеледі, алайда бала 18 жасқа толғанға дейін ақша Ұлттық қор активтерінің құрамында қалып, инвестициялануын жалғастырады.
Жылдар бойынша есептелген сома:
- бағдарламаның алғашқы жылында — 100,52 доллар;
- келесі жылы — 129,38 доллар;
- 2026 жылы — 130,71 доллар.
Инвестициялық табыстың есебінен бағдарламаға үш жылдан бері қатысып келе жатқан баланың жинағы 370,56 долларға жетті.
Екі жылдан бері қатысып келе жатқан балаларда — 263,93 доллар, ал бағдарламаға алғаш рет 2026 жылы қосылғандарға 130,71 доллар есептелген.
2026 жылы бағдарлама 6 918 656 баланы қамтыды.
Ақшаға тек 18 жастан кейін қол жеткізуге болады
Бала кәмелетке толғанға дейін жинақты қолма-қол алуға немесе басқа мақсаттарға жұмсауға болмайды.
18 жасқа толғаннан кейін жиналған қаражат оның БЖЗҚ-дағы нысаналы жинақтау шотына аударылады. Осыдан кейін қаражат иесі оны заңда белгіленген мақсаттардың біріне пайдалана алады.
Ақшаны:
- Қазақстан аумағында тұрғын үй жағдайын жақсартуға;
- Қазақстанда немесе шетелде білім алуға
жұмсауға болады.
Жинақты толық көлемде де, оның бір бөлігін ғана да пайдалануға рұқсат етіледі.
Яғни 18 жасқа толған бойда барлық ақшаны бірден жұмсау міндетті емес. Қалған қаражат нысаналы жинақтау шотында сақталады.
2026 жылы тұрғын үйге 31 млн доллардан астам бағытталды
Бағдарлама қаражатын пайдалануда тұрғын үй бағыты басым болып отыр.
2026 жылдың басынан 1 қыркүйекке дейін 170 156 адамға жалпы сомасы 44,84 млн доллар төленді.
Соның ішінде 119 279 қазақстандық тұрғын үй жағдайын жақсартуға 31 млн доллардан астам қаражат пайдаланған.
Тағы 50 877 адам білім алуға 13,83 млн доллар бағыттады.
Тұрғын үй бойынша ең жиі таңдалған мақсат — кейін баспана сатып алу үшін тұрғын үй құрылыс жинақ жүйесіндегі салымды толықтыру.
Осы бағытта 117 712 адамға 30,51 млн доллар аударылған.
Білім беру саласында қаражаттың басым бөлігі Қазақстандағы оқу орындарының қызметін төлеуге жұмсалды. Бұл мақсатта 47 584 адам жалпы 12,96 млн доллар пайдаланған.
Ал 861 алушы шетелде оқу үшін шамамен 220,44 мың доллар жұмсаған.
Ақшаны алу үшін қайда жүгіну керек?
Қаражат БЖЗҚ-дан тікелей пәтер сатушысына немесе университетке аударылмайды. Ол үшін уәкілетті операторлар арқылы өтініш беру қажет.
БЖЗҚ-ның өзекті ақпараты бойынша:
- Отбасы банк — тұрғын үй және білім беру бағыттары бойынша;
- Halyk Bank — білім беру бойынша;
- Банк ЦентрКредит — білім беру бойынша өтініштерді қабылдайды.
Кәмелетке толған қатысушы уәкілетті операторға жүгініп, АҚШ долларында банк шотын ашуы және қаражатты пайдалану мақсатын көрсетіп, онлайн өтініш беруі керек.
Баланың шотында қанша ақша барын қалай тексеруге болады?
Ата-аналар мен заңды өкілдер баланың 18 жасқа толуын күтпей-ақ жинақ көлемін тексере алады.
Баланың бағдарламаға қатысатыны және оған қанша қаражат есептелгені туралы ақпаратты «Ұлттық қор – балаларға» арнайы сервисі арқылы ЖСН бойынша көруге болады.
Сондай-ақ мәлімет eGov жеке кабинетінде, eGov Mobile қосымшасында және осы қызметті қолдайтын банк қосымшаларында қолжетімді.
2026 жылы 18 жасқа толатын қатысушылар нысаналы жинақтары туралы ақпаратты БЖЗҚ немесе электронды үкіметтегі жеке кабинеті арқылы өздері тексере алады.
10 жыл пайдаланылмаған ақша зейнетақы шотына түседі
18 жастан кейін жинақты бірден пайдалану міндетті емес. Бірақ нысаналы жинақтау шотында сақтау мерзімі шектеулі.
Егер қаражат кәмелетке толғаннан кейін 10 жыл ішінде пайдаланылмаса, ол алушының ерікті зейнетақы жарналары есептелетін жеке зейнетақы шотына аударылады.
Бағдарламаға қатысу құқығы Қазақстан азаматтығына байланысты. Азаматтықтан айырылған жағдайда нысаналы жинақты пайдалану құқығы тоқтайды.
Қатысушы қайтыс болған жағдайда ақша жоғалмайды. Оны мұрагерлері заңнамада белгіленген тәртіппен ала алады.
2026 жылғы 1 қыркүйекке дейін мұрагерлерге 74,46 мың доллар төленген. Бұл қаражатты 226 адам алған.
Бұған дейін біз «Ұлттық қор – балаларға» бағдарламасы бойынша төлемдер кімге және қалай берілетіні туралы жазған едік.
