Қазақстандық семсерлесушілер тарихи үштікке қол жеткізді.
Ұлттық құрама төрт айдың ішінде Азия чемпионатын, әлем чемпионатын және Азия ойындарын жеңіп, ерлер семсерлесуінде бұрын болмаған нәтижеге жетті, деп хабарлайды DKNews.kz.
Тарихи жетістікке Қазақстан Республикасы ІІМ-нің ARLAN спорт клубының мүшелері, Ұлттық ұлан әскери қызметшілері — лейтенант Руслан Құрбанов, ефрейторлар Ерлік Сертай, Вадим Шарлаимов және қатардағы жауынгер Кирилл Проходов үлес қосты.
Төрт айда үш ірі чемпиондық
Қазақстан құрамасының биылғы нәтижесі әлемдік семсерлесу үшін ерекше оқиға болды. Бұған дейін ерлер арасындағы семсерлесуден бірде-бір ұлттық құрама бір жылдың ішінде өз құрлығының чемпионатын, әлем чемпионатын және құрлықтық ойындарды қатар жеңіп көрмеген.
Бұл Қазақстан спорты үшін де тарихи көрсеткіш. Бұған дейін еліміздің бірде-бір спорт түріндегі ұлттық құрамасы бір маусымда халықаралық күнтізбедегі басты үш жарыстың барлығында чемпион атанбаған.
Қазақстандық семсерлесушілердің тарихи сериясы:
- Делиде өткен Азия чемпионатындағы командалық алтын;
- Гонконгтағы әлем чемпионатының командалық сайысындағы алтын;
- Нагояда өткен Азия ойындарындағы алтын медаль.
Спорттың кейбір түрлерінде осындай ауқымды жетістіктерге арнайы атау беріледі. Мәселен, теннисте «Үлкен дулыға», футболда «требл» ұғымы қолданылады. Семсерлесуде мұндай нәтиженің ресми атауы қалыптаспағанымен, Қазақстан құрамасының бір маусымда үш басты халықаралық доданы жеңуі мазмұны жағынан өзіндік «Үлкен дулығаға» айналды.
Алғашқы тарихи алтын Гонконгта алынды
Жеңісті серия маусым айында басталды. Қазақстандық семсерлесушілер Делиде өткен Азия чемпионатында командалық есепте чемпион атанды.
Арада бір ай өткен соң құрама тағы бір тарихи белесті бағындырды. Гонконгта қазақстандық спортшылар әлем чемпионатының командалық сайысында алғаш рет алтын медаль жеңіп алды.
Осылайша ұлттық құрама құрлық біріншілігіндегі жеңістен кейін әлем чемпионы мәртебесіне де қол жеткізді.
Фото: Владислав Семенов / ҚР ҰОК
Тарихи серияның шешуші кезеңі Нагояда өткен Азия ойындарында болды.
Финалда Қазақстан сапында лейтенант Руслан Құрбанов, ефрейторлар Вадим Шарлаимов пен Ерлік Сертай және қатардағы жауынгер Кирилл Проходов Оңтүстік Корея құрамасына қарсы шықты.
Шешуші бәсеке Қазақстан үшін қиын өрбіді. Финал барысында қазақстандықтар қарсыластарынан тоғыз ұпайға дейін қалып қойды.
Алайда команда есеп айырмасын қысқартып қана қоймай, кездесудің тағдырын толық өзгертті. Қазақстандық семсерлесушілер 43:42 есебімен жеңіске жетіп, Азия ойындарының алтын медалін иеленді.
Осы жеңіс төрт айға созылған тарихи серияны түйіндеді: Қазақстан бір маусымда Азия чемпионы, әлем чемпионы және Азия ойындарының чемпионы атанды.
Бұған дейін біз Руслан Құрбанов, Ерлік Сертай, Кирилл Проходов және Вадим Шарлаимов өнер көрсеткен Қазақстан құрамасының семсерлесуден тарихта алғаш рет әлем чемпионы атанғаны туралы жазған едік.
