Қазақстанда кітап сыйлау эстафетасы басталды. Республика күні қарсаңында тұрғындарды жақындарына ізгі тілегі жазылған кітап тарту етуге және осы бастаманы достарына жалғастыруға шақырып жатыр. «Саған кітап арнадым» акциясы республикалық «Кітап оқитын ұлт» марафоны аясында өтіп жатыр, деп хабарлайды DKNews.kz.
Бастаманы «Кітап оқитын ұлт» қоры көтерді. Ұйымдастырушылар қазақстандықтарға 25 қазанда атап өтілетін мемлекеттік мерекені ерекше сыйлықпен қарсы алуды ұсынады. Ол үшін кітап таңдап, оны неліктен сыйлағысы келетінін түсіндіріп, өзіне қымбат адамға табыстау жеткілікті.
Акцияға қатысу үшін жаңа кітап сатып алу міндетті емес
Кітап дүкеніне барудың қажеті жоқ. Жеке кітапханаңыздағы жақсы сақталған шығарманы да сыйға тартуға болады.
Бастаманың басты ерекшелігі — кітаппен бірге жүрекжарды тілек жолдау. Қатысушыларға кітаптың алғашқы таза бетіне жылы лебізін жазу немесе сыйлық алушы мен сыйлаушының есімдері көрсетілген ашықхат салу ұсынылады.
Сондай-ақ дәл осы шығарманы неліктен таңдағанын айтып берген жөн. Бұл сүйікті роман, белгілі бір мәселені тереңірек түсінуге көмектескен еңбек немесе көптен бері өзгелерге оқуға кеңес бергіңіз келген кітап болуы мүмкін.
Кітапты отбасы мүшесіне, досыңызға, әріптесіңізге, сыныптасыңызға немесе курстасыңызға сыйлай аласыз.
Ұйымдастырушылар әдеби жанрға шектеу қоймайды. Қандай кітап сыйлайтынын әр қатысушы өзі шешеді.
Аян Сақошев кітап сыйлау эстафетасының мақсатын түсіндірді
«Кітап оқитын ұлт» қорының атқарушы директоры Аян Сақошев бұл бастаманы кітап оқуды күнделікті өмірдің ажырамас бөлігіне айналдыру мақсатымен байланыстырады.
Оның айтуынша, Республика күні елдің жетістіктері туралы ғана емес, келер ұрпаққа қандай құндылықтарды аманат ететініміз жөнінде де ойлануға мүмкіндік береді.
«Республика күні — еліміздің болашағын қалай қалыптастырып жатқанымыз және кейінгі ұрпаққа қандай құндылықтарды жеткізетініміз туралы ойланатын уақыт. Кітап — ерекше сыйлық. Өйткені кітап сыйлау арқылы біз білімімізбен, ойларымызбен бөлісіп, әлемге жаңаша қарауға мүмкіндік береміз. «Саған кітап арнадым» акциясы — кітап оқуды күнделікті өмірдің бір бөлігіне айналдырудың қарапайым әрі мағыналы жолы. Біз үшін кітаптың адамдарды әңгімеге тартып, жақындастыруы және жаңа шығармаларды оқуға ынталандыруы маңызды. Осындай шынайы әрекеттердің арқасында кітап оқитын ұлттың мәдениеті қалыптасатынына сенімдімін», — деді Аян Сақошев.
Ұйымдастырушылар кітап сыйлау адамдардың әдебиет туралы пікір алмасуына себеп болады деп үміттенеді. Өйткені оқырманға шығарма ғана емес, оны оқыған адамның жеке ұсынысы да жетеді.
Ал кітап сыйлаған адам өзінің оқырмандық тәжірибесімен бөлісе алады.
«Саған кітап арнадым» акциясына қалай қатысуға болады?
Акцияға қосылу үшін арнайы іс-шараны күтудің қажеті жоқ. Кітап таңдап, оны сыйға тарту және қаласаңыз, сол сәтті әлеуметтік желіде бөлісу жеткілікті.
Қатысушыларға кітаптың фотосын немесе қысқа бейнеролик жариялап, қандай шығарма сыйлағанын және оны кімге арнағанын айтып беру ұсынылады.
Жарияланымда марафонның @kitap_oqityn_ult ресми парақшасын белгілеп, #СағанКітапАрнадым #КнигаДляТебя #BookForYou #Republicday хэштегтерін қолдануға болады.
Бұдан кейін эстафетаны достарына, әріптестеріне немесе таныстарына жолдай алады. Осылайша бастамаға жаңа адамдар қосылып, кітап сыйлау дәстүрі кеңірек таралуы мүмкін.
Ұйымдастырушылар ұсынған шарттарда белгілі бір автордың шығармасын сатып алу немесе міндетті әдебиеттер тізімінен кітап таңдау талабы жоқ. Қатысу ерікті, ал кітап таңдау әр адамның өз еркінде.
Жаңа бастама «Кітап оқитын ұлт» марафонын толықтырады
«Саған кітап арнадым» акциясы елімізде кітап оқу мәдениетін насихаттауға бағытталған республикалық марафон аясында ұйымдастырылып отыр.
Бұған дейін біз «Кітап оқитын ұлт» марафонына миллион қатысушының қосылғаны туралы жазған едік. Марафон бағдарламасында әдеби шығармаларды оқу, пікір жазу және зияткерлік тапсырмаларды орындау қарастырылған.
Ал жаңа акция қатысудың өзгеше жолын ұсынады. Мұнда оқырман тапсырма орындаудың орнына өзі ұнатқан кітапты басқа адамға таныстырып, оны оқуға қызықтыра алады.
Бұл бастама марафонның негізгі бағдарламасына қатыспайтын қазақстандықтарға да кітап оқу мәдениетін қолдауға мүмкіндік береді. Ол үшін байқауға тіркелу немесе арнайы тапсырма орындау талап етілмейді.
Республика күні қарсаңында ұйымдастырушылар адамдар арасындағы тікелей қарым-қатынасқа мән беріп отыр. Бір адамның кітап сөресінде тұрған шығарма енді басқа оқырманның қолына тиіп, жаңа әсер сыйлауы мүмкін.
Акцияға қатысқысы келетіндерге кітап таңдап, ішіне шынайы тілегін жазып, оны жақын адамына тарту ету жеткілікті. Ал сыйлықтың тарихын әлеуметтік желіде бөлісу кітап оқу эстафетасының жалғасуына септігін тигізеді.
