«Қазақстан – үлкен егіс алқабымен, жоғары өнімділігімен және тамаша сапасымен ерекшеленетін зығыр тұқымын өндірушілердің бірі болып табылады. Бізде зығырды селекциялау, өсіру және өңдеу, сондай-ақ жаңа байланысты өнімдерді әзірлеу және зығыр талшығын пайдалану саласындағы ынтымақтастық үшін кең мүмкіндіктер бар», - деді 2016 жылы Қазақстаннан зығыр тұқымын импорттай бастаған Қытайдың солтүстік-батысындағы Нинся-Хуэй автономиялық ауданындағы азық-түлік кәсіпорындары бірінің төрағасы Ма Шаобинь.
Нинся-Хуэй автономиялық ауданы Қытайдағы зығыр тұқымын өңдейтін және зығыр майын тұтынатын негізгі аймақтардың бірі болып табылады. Мұнда жыл сайын 200 мың тоннадан астам зығыр тұқымын өңдейтін тағамдық май өндіруге лицензия алған 102 өңдеуші кәсіпорын бар. Соңғы жылдары жергілікті кәсіпорындар өсіп келе жатқан нарық сұранысын қанағаттандыру үшін жыл сайын Қазақстаннан және басқа елдерден 150 мың тоннадан астам зығыр шикізатын сатып алады.
Статистикаға сәйкес, 2022 жылы Нинся-Хуэй автономиялық ауданы Қазақстаннан 55,62 млн юаньға (шамамен 7,75 млн АҚШ доллары) зығыр тұқымын әкелсе, 2023 жылы бұл аймақ Қазақстаннан 113,09 млн юаньға зығыр тұқымы, арпа және күнбағыс тұқымын импорттаған. 2021 жылы зығыр майы және басқа да өнімдерді өндіруге маманданған Ningxia Liupan Zhenfang Ecological Agriculture Technology Co., Ltd. компаниясы Астанада компанияны тіркеп, жергілікті кәсіпорындармен бірлесіп Қостанай облысында жаңа үлгілі тәжірибелік сорттарды культивациялау үшін зығыр тұқымын өсіру базасын құрды.
Соңғы жылдары, деректерге қарағанда, екі жақтың тауар айналымының көлемі 2014 жылғы 52,85 млн юаньнан 2023 жылы 180 млн юаньға дейін өсіп, орташа жылдық өсу қарқыны 14,6 пайызды құрады, екі жақ арасындағы экспорт-импорт сауда өнімдері зығыр тұқымы, феррохром, арпа, полиэтилен, машиналар мен жабдықтарды қамтиды.
«Белдеу және жол» бастамасы іске қосылғаннан бері Нинся мен Орталық Азия елдері арасындағы экспорт пен импорттың жалпы көлемі 1,89 млрд юаньді құрады. Бұл ретте Қазақстан Орталық Азия елдерінен осы автономиялық аймақтың ең ірі сауда серіктесі болып табылады.
