21-23 ақпан аралығында Шанхайда өтетін 2025 Жаһандық әзірлеушілер конференциясына әлемнің түкпір-түкпірінен 100-ге жуық әзірлеушілер қауымдастығы қатысады деп күтілуде. Бұл туралы шараны ұйымдастырушы Шанхай жасанды интеллект индустриясы қауымдастығы (SAIA) хабарлады.
Конференцияда ірі модельдер, есептеу қуаты, деректер жинау, құрал-саймандар және бағдарламалық платформалар сияқты негізгі технологияларға назар аударылады. Әзірлеушілер қауымдастығы аппараттық қамтамасыз етуді әзірлеу, бұлттық есептеулер, үлкен деректер, заттар интернеті, жасанды интеллект, робототехника, блокчейн және метағалам сияқты әртүрлі салаларды ұсынатын болады.
Hugging Face, Microsoft әзірлеушілер қауымдастығы, Alibaba-ның ModelScope қауымдастығы және Huawei қауымдастығы сияқты жетекші жаһандық қауымдастықтар конференция барысында көптеген қызықты іс-шараларды өткізеді. Конференцияға соңғы уақытта үлкен назар аударып отырған DeepSeek командасы да қатысады, деп хабарлады SAIA. Конференцияда әзірлеушілерге сала сарапшыларымен өзара әрекеттесуге және идеялармен алмасуға мүмкіндік беретін интерактивті іс-шаралар мен семинарлар өтеді.
Ғылым мен технологияның қарқынды дамуын ескере отырып, конференция биылдан бастап жылына екі рет өткізіледі, келесісі күзге жоспарланған, деді SAIA жауапты хатшысы Чжун Цзюньхао.
