Жаһандық сауда мен тұтыну үрдістерін айқындайтын негізгі платформа болып саналатын Қытайдың 5-ші халықаралық тұтыну тауарлары көрмесі (CICPE) 13-18 сәуір аралығында оңтүстік Қытайдың Хайнань провинциясының астанасы Хайкоу қаласында өтеді, деп хабарлайды Xinhua.
Бұл туралы шараны ұйымдастырушылар брифингте хабарлады.
ҚХР Сауда министрлігі мен Хайнань провинциясының халық үкіметі бірлесіп ұйымдастырған биылғы көрме инновация саласындағы соңғы жетістіктерді жұртшылыққа көрсететін халықаралық қатысушылардың кеңейтілген құрамымен ерекшеленеді. Қытайдың инновациялық басымдықтарына сәйкес, ЭКСПО негізінен жасанды интеллект, төмен биіктіктегі авиация, интеллектуалды көлік құралдары және кешенді денсаулық сақтау сияқты дамып келе жатқан тұтынушылық серпіліс салаларына назар аударады. Huawei, iFLYTEK және Tesla сияқты жетекші технологиялық компаниялар осы салалардағы озық шешімдерін көрсетеді.
Хайнань халықаралық конгресс-көрме орталығы CICPE-дің негізгі орны болып қала береді, қосымша бажсыз сауда алаңдары Хайкоу мен Саньядағы халықаралық дьюти-фри сауда кешендерінде орналасады. Сонымен қатар, Саньяда яхталар көрмесі өтеді. Биылғы жылы шараға жаңадан келгендер Словакия, Бразилия және Сингапур делегациялары болады. Көрмеге қатысушылардың қатарында америкалық Estee Lauder корпорациясы мен германиялық Volkswagen автомобиль концерні сияқты трансұлттық алыптар бар.
Қытайлық экспоненттер премиум класты өнімдер мен ерекше жергілікті өнімдерді көрсетеді. Одан бөлек, көрменің жеке алаңы шетелдік сатып алушылар мен қытайлық өндірушілер арасында байланыс орнату үшін бөлінеді, онда инвестициялық серіктестерді жеке таңдау бойынша іс-шаралар өткізіледі.
CICPE – Қытайдағы жалғыз ұлттық деңгейдегі тұтыну тауарлары көрмесі және Азия-Тынық мұхиты аймағындағы ең ірі тұтынушылық ЭКСПО.
