Қытайдың үш жасқа толмаған әрбір балаға жылына 3600 юань (шамамен 503 АҚШ доллары) мөлшерінде белгіленген бала күтіміне берілетін субсидия отбасының кірісін тікелей арттырып, жыл сайын 10 миллионнан астам үй шаруашылығын қамтымақ, деп мәлімдеді ҚХР Денсаулық сақтау істері жөніндегі мемлекеттік комитет (NHC) басшысының орынбасары Го Яньхун, деп хабарлайды Xinhua.
Оның айтуынша, субсидия отбасылардың бала тәрбиелеудегі қаржылық жүктемесін азайтуға бағытталған. Бала туу деңгейін қолдауға бағытталған мақсатты экономикалық шара ретінде төлемдер бюджеттік қаржыландыру арқылы жүзеге асырылатын болады.
Ведомство басшысының орынбасары субсидия туу көрсеткішін арттыруға қолайлы әлеуметтік ортаны құруға көмектесетінін және бала күтімі, білім беру, жұмыспен қамту, салық салу және тұрғын үймен қамтамасыз ету салаларындағы тиісті саясаттармен бірге жұмыс істейтінін атап өтті.
Субсидия мөлшері балаларды тәрбиелеу шығындары мен бюджет мүмкіндіктерін ескере отырып, сондай-ақ халықаралық тәжірибеге сүйене отырып белгіленді. Го Яньхунның айтуынша, тікелей қаржылық қолдау - дүние жүзінде тууды ынталандырудың кең таралған құралы. Қытайда жергілікті билік органдары осындай шаралармен пилоттық жобаларды жүзеге асырып, тұрғындардың оң бағасын алған.
