Жақында «Бір белдеу, бір жол» бастамасы аясындағы Қытай–Қырғызстан бірлескен мәдени мұраны қорғау зертханасының Бішкектегі платформасын қайта жаңғырту және жаңарту жұмыстары аяқталды, деп хабарлайды Xinhua.
Бұл туралы Қытайдың Ганьсу провинциясындағы Дуньхуан академиясы хабарлады.
Жаңғыртудан кейін платформа Ақ-Бешім (Суяб) көне қалашығының қирандыларын зерттеуге арналған кешенді эксперименттік базаға айналды. Онда жедел диагностика, геодезиялық және картографиялық зерттеулер, негізгі физикалық қасиеттерді талдау, материалдардың пайдалану сипаттамаларын сынау, қашықтан мониторинг жүргізу және ерте ескерту жүйелері қарастырылған.
Аталған зертхана 2025 жылы Дуньхуан академиясы мен Қырғызстан Республикасының Мәдениет, ақпарат және жастар саясаты министрлігі жанындағы Тарих және мәдениет ескерткіштерін қорғау жөніндегі республикалық инспекциясының бірлесуімен құрылған. Ақ-Бешім қалашығының қирандылары Қырғызстан аумағында орналасқан және Қытай, Қазақстан және Қырғызстан бірлесіп ЮНЕСКО-ның Бүкіләлемдік мұралар тізіміне ұсынған «Жібек жолы: Чанъань – Тянь-Шань дәлізінің бағыттар желісі» нысанының құрамына кіреді.
