Шыңжаң-Ұйғыр автономиялық ауданының орталығы Үрімжі қаласында Қытай–Еуразия инвестиция және сауданы ілгерілету орталығының онлайн-платформасының іске қосылу рәсімі өтті, деп хабарлайды Xinhua.
Платформа Қытай мен Орталық Азия және Еуропа елдері арасындағы сауда ынтымақтастығын дамытуға бағытталған кешенді цифрлық хаб ретінде құрылған.
Жоба трансшекаралық операциялар жүргізетін кәсіпорындардың қажеттіліктерін ескере отырып, рұқсат құжаттарын рәсімдеу, іскер серіктестер іздеу, кедендік рәсімдеу, логистика және тәуекелдердің алдын алу қызметтерін ұсынады.
Платформаның консулдық қызметтері Орталық Азия елдеріне, оның ішінде Қазақстан мен Өзбекстанға да қолжетімді. Сонымен қатар Орталық Азиядағы индустриялық парктердің ресурстары визуалды форматта ұсынылған, бұл кәсіпорындарға шетелдегі қызмет шарттарымен танысып, инвестициялық шешім қабылдау шығындарын азайтуға мүмкіндік береді.
Қытай–Еуразия инвестиция және сауданы ілгерілету орталығы 2025 жылғы сәуірде Үрімжіде жұмысын бастаған. Қазіргі таңда орталық Қытай мен шетелдің 350-ден астам кәсіпорнына қызмет көрсетіп, Қазақстан, Өзбекстан және Тәжікстанда филиалдарын ашқан.
