2025 жылы Шыңжаң-Ұйғыр автономиялық ауданында шағын көлемді шекаралық сауда саласындағы импорт-экспорт көлемі 209,09 млрд юаньға (30,2 млрд АҚШ доллары) жетті.
Осы көрсеткіш бойынша өңір төртінші жыл қатарынан елде бірінші орынды иеленді, деп хабарлайды Xinhua.
Қытайдың батыс бағыттағы маңызды форпосты саналатын Шыңжаң соңғы жылдары географиялық артықшылықтарын тиімді пайдаланып, көршілес елдермен шекаралық сауда ынтымақтастығын кеңейтіп келеді. 2025 жылы өңірдің жалпы сыртқы сауда көлемі алғаш рет 500 млрд юаньнан асып, жылдық өсім 19,9 пайызды құрады. Өңір сауда айналымының өсу қарқыны бойынша Қытайда бірінші орынға шықты.
Шыңжаң бақылау-өткізу пункттерінің инфрақұрылымын жетілдіріп, кедендік рәсімдеудің инновациялық модельдерін енгізуде. Қытай–Қырғызстан жүк дәлізінде тәулік бойы жұмыс режимі енгізіліп, кедендік рәсімдеу тиімділігі арттырылды. Бүгінде Шыңжаң көршілес елдердің шекаралас өңірлерімен сегіз өңіраралық сауда-экономикалық ынтымақтастық механизмін құрды.
2026 жылы өңір шекаралық өткізу бекеттерін жаңғыртуды жеделдетіп, негізгі автокөлік өткізу пункттерінің жұмыс уақытын ұзартуды және шекаралық саудаға арналған қойма-логистика жағдайларын жақсартуды жоспарлап отыр.
