Қытай 15-бесжылдық кезеңінде (2026–2030 жылдар) көлік секторын цифрлық интеллектуалдандыру мен экологиялық жаңғыртуды ілгерілететін болады. Бұл туралы Қытайдың көлік министрі Лю Вэй мәлімдеді, деп хабарлайды Xinhua.
Оның айтуынша, алдағы бес жыл ішінде ел көлік саласында жасанды интеллектті қолдануды кеңейтуге ерекше назар аударады. Сонымен қатар «ақылды» автомобиль жолдарын, «ақылды» порттарды және «ақылды» кеме қатынасын дамыту жеделдетіледі. Бұл туралы Лю Вэй Бейжіңде өтіп жатқан Бүкілқытайлық халық өкілдері жиналысының 14-шақырылымының 4-сессиясы аясында айтты.
Министрдің сөзінше, Қытай көлік секторында төмен көміртекті дамуды ынталандыру мақсатында көмірқышқыл газының нөлдік шығарындыларына негізделген көлік дәліздері мен станцияларын дамыту жобаларын іске асырады.
15-бесжылдық кезеңінде елде жаңа энергия көздеріне негізделген көлік құралдары мен кемелерді қоса алғанда, экологиялық таза көлік жабдықтарын қолдану кеңейтіледі.
Қазіргі уақытта Қытайдағы жедел автомагистральдардағы қызмет көрсету аймақтарының 98,8 пайызы электр көліктерін зарядтауға арналған құрылғылармен жабдықталған. Министрдің айтуынша, биыл елде жоғары қуатты зарядтау құрылғыларын енгізуге басымдық беріледі. Бұл зарядтау станцияларын табу қиындықтарын азайтып, кезек күту уақытын қысқартуға мүмкіндік береді.
Сондай-ақ 15-бесжылдық кезеңінде қалалық агломерациялар арасындағы сапарлардың тиімділігін арттыруға бағытталған жобалар іске асырылып, тұрғындардың едәуір бөлігі жұмыс орнына бір сағат ішінде барып-келе алатын жағдай жасалады.
Лю Вэйдің айтуынша, көлік секторы халыққа қызмет көрсетуде аса маңызды рөл атқарады. Қазіргі кезде Қытайда күн сайын шамамен 550 млн сәлемдеме өңделеді, бұл орта есеппен әрбір қытайлық аптасына шамамен үш сәлемдеме алады деген сөз.
