Азия инфрақұрылымдық инвестициялар банкі (АИИБ) жалпы көлемі 3 млрд юань (шамамен 434,9 млн АҚШ доллары) болатын панда-облигациялар шығарғанын жариялады. Бұл ретте облигацияларға жазылу көлемі мен инвесторлар саны рекордтық деңгейге жетті, деп хабарлайды Xinhua.
Банк мәліметінше, облигациялар үш жыл мерзімге шығарылған, ал олардың купондық мөлшерлемесі 1,7 пайызды құрайды. Барлығы 34 инвестор облигацияларға жазылды, ал жалпы сұраныс көлемі 9 млрд юаньға жетті. Инвесторлардың жоғары қызығушылығына байланысты бастапқыда жоспарланған 2 млрд юаньдық эмиссия көлемі 3 млрд юаньға дейін ұлғайтылды.
Шығарылған облигациялардың 58 пайызын шетелдік инвесторлар сатып алса, қалған 42 пайызы қытайлық инвесторларға тиесілі болды.
АИИБ қазынашысы және банктің қаржы жөніндегі бас директорының міндетін атқарушы Доменико Нарделлидің айтуынша, әлемдік нарықтардағы тұрақсыздыққа қарамастан Қытайдың облигациялық нарығы тұрақты жұмыс істеп, сапалы эмитенттер үшін жоғары тартымдылық көрсетіп отыр.
АИИБ 2016 жылы жұмысын бастады және қазіргі уақытта әлемнің 111 елін біріктіреді. Осы уақытқа дейін банк жалпы көлемі 19,5 млрд юань болатын сегіз рет панда-облигация шығарды.
Панда-облигациялар — бұл Қытайда шетелдік эмитенттер шығаратын және юаньмен номиналданатын борыштық бағалы қағаздар. Олар халықаралық институттар үшін маңызды қаржыландыру арнасы болып табылады.
