Өңірлер мен елдер бойынша алғанда, Оңтүстік-Шығыс Азия мемлекеттері қауымдастығы (АСЕАН) Қытайдың ең ірі сауда серіктесі мәртебесін сақтап отыр, деп хабарлайды Xinhua.
2026 жылдың алғашқы екі айында Қытай мен АСЕАН елдері арасындағы сауда көлемі 1,24 трлн юаньнан асты. Бұл өткен жылдың сәйкес кезеңімен салыстырғанда 20,3 пайызға көп.
Екінші орында Еуропалық одақ тұр. Қытай мен ЕО арасындағы тауар айналымы осы кезеңде 998,94 млрд юаньды құрап, жылдық есеппен 19,9 пайызға артты.
Сонымен қатар ресми деректерге сәйкес, Қытайдың Латын Америкасымен сауда көлемі 19,7 пайызға, ал Африка елдерімен саудасы 34,2 пайызға өсті.
Ал Қытай мен АҚШ арасындағы сауда көлемі осы кезеңде 609,71 млрд юаньды құрап, өткен жылдың сәйкес кезеңімен салыстырғанда 16,9 пайызға төмендеді.
Қытайдың Бас кеден басқармасының мәліметі бойынша, 2026 жылдың алғашқы екі айының қорытындысында Қытай мен «Бір белдеу, бір жол» бастамасына қатысушы елдер арасындағы сауда айналымы 4,02 трлн юаньға жетті. Бұл көрсеткіш жылдық есеппен 20 пайызға артқан.
Сол баспасөз мәслихатында Қытайдың сауда министрі Ван Вэньтао биыл Қытай экспортты тұрақтандыру және ішкі нарықтағы мүмкіндіктерді кеңейту арқылы сауданың теңгерімді өсуіне ықпал ететінін айтты.
Оның айтуынша, Қытай ауыл шаруашылығы өнімдерінің, премиум санаттағы тұтыну тауарларының, заманауи жабдықтар мен негізгі компоненттердің импортын ұлғайтуды жоспарлап отыр.
Сонымен қатар Қытай цифрлық сауда мен «жасыл» сауданы дамытуды жеделдетіп, жасанды интеллект өнімдері мен экологиялық таза энергия өндіруге арналған жабдықтардың экспортын кеңейтуді көздейді. Бұл сыртқы сауданың жаңа қозғаушы күштерін қалыптастыруға бағытталған.
