Apple компаниясы 2026 жылдың 15 наурызынан бастап Қытайдың құрлықтық бөлігінде App Store дүкеніндегі қосымша ішіндегі сатып алулар үшін алынатын комиссия мөлшерін төмендететінін жариялады, деп хабарлайды Xinhua.
Қытайдың реттеуші органдарымен жүргізілген келіссөздерден кейін Apple компаниясы App Store платформасындағы iOS және iPadOS операциялық жүйелеріне арналған комиссиялық мөлшерлемелерді азайту туралы шешім қабылдады.
Қосымша ішіндегі сатып алулар мен ақылы қосымшалар үшін стандартты комиссия қазіргі 30 пайыздан 25 пайызға дейін төмендетіледі.
Ал App Store Small Business Program және Mini Apps Partner Program бағдарламалары аясында қосымша ішіндегі сатып алуларға және бірінші жылдан кейін автоматты түрде жаңартылатын жазылымдарға алынатын комиссия 15 пайыздан 12 пайызға дейін қысқарады.
Жаңа комиссия мөлшерлемелері 2026 жылдың 15 наурызынан бастап күшіне енеді. Сонымен қатар әзірлеушілерге келісімшарттарды қайтадан рәсімдеудің қажеті болмайды.
Apple компаниясы барлық әзірлеушілер үшін әділ әрі ашық шарттарды қолдауға және Қытайда қосымшаларын тарататын әзірлеушілерге бәсекеге қабілетті App Store тарифтерін ұсынуды жалғастыратынын мәлімдеді.
