27 наурыз күні Қазақстандағы Қытай Халық Республикасының Елшісі Хань Чуньлинь Астанада Қытайдың «екі сессиясының» шешімдерінің рухына арналған баспасөз мәслихатын өткізді. Іс-шараға 30-ға жуық бұқаралық ақпарат құралдарының өкілдері қатысты, деп хабарлайды Xinhua.
«Осы жылдың наурыз айында Бейжіңде Қытай Халық Республикасының Бүкілқытайлық халық өкілдері жиналысының 14-шақырылымының 4-сессиясы және Қытай Халықтық саяси консультативтік кеңесінің 14-шақырылымының 4-сессиясы табысты өтті», — деп мәлімдеді елші.
Оның айтуынша, Бүкілқытайлық халық өкілдері жиналысының сессиясында үкімет жұмысы туралы есеп бойынша қарар және 15-бесжылдық халық шаруашылығы мен әлеуметтік даму жоспарының (2026–2030 жылдар) негізгі бағыттары туралы қарар қабылданды. Сонымен қатар Экология кодексі, Ұлттық бірлік пен прогреске жәрдемдесу туралы заң және Ұлттық даму жоспарлау туралы заң сияқты үш маңызды заң қабылданды.
Хань Чуньлинь атап өткендей, 15-бесжылдық жоспардың негізгі бағыттарында 20 негізгі көрсеткіш бекітіліп, жоғары сапалы дамуды ынталандыру, ұлттық экономиканың ішкі айналымын нығайту, халықтың жалпы әл-ауқатын арттыру және даму мен қауіпсіздік салаларындағы жұмыстарды кешенді жоспарлау сияқты төрт бағыт бойынша стратегиялық міндеттер айқындалды. Сондай-ақ 109 ірі жоба белгіленді.
Қытай дипломатының айтуынша, әлемде тұрақсыздық күшейіп тұрған кезеңде Қытайда басқарудың жүйелілігі, экономиканың сенімді дамуы және қоғамдағы тұрақтылық байқалады. «Тәртіптен артық игілік жоқ, ал бейберекетсіздіктен асқан қауіп жоқ. Нық мақсатқа ұмтылған, тұрақты әрі қарқынды дамып келе жатқан Қытай өз халқының жақсы өмірге деген сенімін нығайтып қана қоймай, бүкіл әлемге пайда әкеліп, даму мүмкіндіктерін ашады», — деді ол.
Хань Чуньлинь халықаралық жағдайдың жылдам өзгеруіне қарамастан, Қытай заман талабына сай дамуды жалғастыратынын, халықаралық қатынастарда теңдік пен әділдікті қорғап, қақтығыстарды диалог пен консультациялар арқылы шешуді қолдайтынын атап өтті. Сонымен қатар ол унилатерализм мен қысым көрсетуге қарсы тұру, бейбітшілікті сақтау, жаһандық дамуды қолдау және халықаралық тәртіпті қорғау Қытай саясатының маңызды бағыттары болып қала беретінін айтты.
Дипломат Қытай мен Қазақстанның ортақ таулар мен өзендер арқылы байланысқан тату көршілер, жақсы достар және сенімді серіктестер екенін атап өтті. «Тарихтың жаңа кезеңінде екі ел мемлекет басшыларының маңызды келісімдерін басшылыққа ала отырып және бір-бірінің дамуын өз дамуының мүмкіндігі ретінде қарастыра отырып, тараптар саяси өзара сенімді нығайтуы, даму стратегияларын тиімді үйлестіруі, «Бір белдеу, бір жол» бастамасын сапалы түрде ілгерілетуі, экономика, сауда, энергетика, көлік, пайдалы қазбалар, білім, ғылым, техника және мәдениет салаларындағы өзара тиімді ынтымақтастықтың сапасын арттыруы тиіс. Бұл қытай-қазақстан қатынастарының жаңа «алтын отызжылдығын» бірлесіп қалыптастыруға, екі ел арасындағы ортақ тағдыр қауымдастығын нығайтуға және нақты нәтижелер арқылы халықтарға пайда әкеліп, бүкіл әлемге тұрақтылық пен оң серпін беруге мүмкіндік береді», — деп қорытындылады Хань Чуньлинь.
