Қытай 2026 жылғы алаяқтыққа қарсы күрес жөніндегі жаһандық саммитте телекоммуникациялық алаяқтыққа қарсы іс-қимыл саласында қол жеткізілген жетістіктер туралы мәліметпен бөлісіп, осы бағытта халықаралық ынтымақтастықты одан әрі күшейтуге шақырды, деп хабарлайды Xinhua.
Бұл туралы сейсенбі күні Қытайдың Қоғамдық қауіпсіздік министрлігі хабарлады.
Аталған саммит алаяқтықпен күрес саласындағы әлемдегі ең беделді конференциялардың бірі болып табылады. Оның ұйымдастырушылары — БҰҰ-ның Есірткі және қылмыс жөніндегі басқармасы және Халықаралық қылмыстық полиция ұйымы (Интерпол). Биылғы іс-шара 16–17 наурыз күндері Вена қаласында өтіп, оған 1300-ден астам делегат қатысты.
Қытай делегациясы Қоғамдық қауіпсіздік министрлігі мен басқа да құрылымдардың өкілдерінен құралды. Делегация мүшелері құқық қорғау саласындағы жаһандық ынтымақтастық платформасын құру мәселесі бойынша басқа қатысушылармен жан-жақты пікір алмасты.
Олар телекоммуникациялық алаяқтықтың келтіретін зиянының айтарлықтай екенін атап өтіп, Қытайдың трансшекаралық телекоммуникациялық алаяқтықпен күресте халықаралық қауымдастықпен бірлесіп жұмыс істеуге дайын екенін растады.
Саммит аясында Қытай делегациясы телекоммуникациялық және кибералаяқтыққа қарсы халықаралық альянс құруға арналған іс-шара мен осы саладағы Қытайдың табысты тәжірибесін таныстыратын көрме ұйымдастырды. Бұл бастамалар тәжірибе алмасуға және трансшекаралық ынтымақтастықты нығайтуға бағытталған.
