Қытайдың өндірістік емес секторындағы сатып алу менеджерлері индексі (PMI) 2026 жылдың наурыз айында 50,1 деңгейін құрады. Бұл көрсеткіш ақпан айымен салыстырғанда 0,6 тармаққа жоғары. Бұл туралы Қытайдың Мемлекеттік статистика басқармасы жариялаған деректерде айтылды, деп хабарлайды Xinhua.
Ведомство мәліметінше, бұл өндірістік емес сектордағы іскерлік ахуалдың жақсарғанын көрсетеді. Индекстің 50-ден жоғары болуы сектордың кеңеюін, ал 50-ден төмен болуы қысқаруын білдіреді.
Қызмет көрсету саласындағы іскерлік белсенділік субиндексі наурыз айында 50,2 деңгейінде қалыптасты, бұл ақпанмен салыстырғанда 0,5 тармаққа жоғары. Әсіресе теміржол тасымалы, телекоммуникациялар, радио және теледидар, спутниктік байланыс қызметтері, қаржы және сақтандыру салаларында жоғары белсенділік байқалып, олардың көрсеткіштері 55-тен асты.
Сонымен қатар бөлшек сауда, қонақүй бизнесі, қоғамдық тамақтану және жылжымайтын мүлік секторларында белсенділік салыстырмалы түрде төмен болды.
Өндірістік емес сектордағы іскерлік күтулер индексі 54,2 деңгейінде қалып, салыстырмалы түрде жоғары көрсеткішті сақтады. Бұл аталған сектор кәсіпорындарының нарықтың болашағына қатысты оң болжамдарын сақтап отырғанын білдіреді.
