Қытай өнеркәсіп және ақпараттандыру министрлігінің ақпараттық және коммуникациялық технологияларды дамыту департаменті басшысының орынбасары Чжао Цэ ғарыштық есептеу қуаттары секторын жүйелі және кезең-кезеңімен дамыту қажеттігін атап өтті, деп хабарлайды Xinhua.
Чжао Цэ Бейжіңде өткен салалық конференцияда сөйлеген сөзінде ғарыштық есептеу қуаттарының орбитада деректерді нақты уақыт режимінде өңдеу, энергия шығындарының төмендігі және кең аумақты қамту сияқты бірқатар артықшылықтарға ие екенін айтты.
Оның айтуынша, соңғы жылдары Қытай ғарыштық есептеу желілерін құру мен сынақтан өткізуді кезең-кезеңімен жүзеге асырып, технологиялық серпілістерді жеделдетіп, спутниктік топтамаларды қалыптастыру бойынша бірқатар жобаларды ілгерілетті.
Шенеунік бұл бағытта құрылыс пен қолдануды ынталандыратын саясаттық шараларды әзірлеу, тиісті мүмкіндіктері бар өңірлерге жергілікті ерекшеліктерді ескере отырып пилоттық жобаларды жүзеге асыруға қолдау көрсету қажеттігін атап өтті. Сондай-ақ радиацияға төзімді борттық микросхемалар мен спутниктер арасындағы лазерлік байланыс сияқты технологиялар мен өнімдерді әзірлеуді қолдау маңызды екені айтылды.
Бұдан бөлек, ғарыштық есептеу қуаттарын қашықтықтан зондтау деректерін нақты уақыт режимінде өңдеу, байланыс жүйелерін күшейту, кеңістік-уақыттық ақпаратпен жұмыс істеу сияқты бағыттарда қолдану мүмкіндіктерін кеңейту қажет. Сонымен қатар төмен биіктіктегі экономика және төтенше байланыс салаларында орбитада деректерді өңдеуді қолдау маңызды екені атап өтілді.
