Жергілікті билік мәліметінше, Қытай-Еуропа теміржол экспрессі аясындағы Транскаспий бағыты (Сиань) 2026 жылдың бірінші тоқсанында тұрақты өсім көрсетті. Бұл бағыт Қытай мен Еуропа арасындағы байланысты жылдам әрі тұрақты етуге мүмкіндік беруде.
Бағыт Қытайдың солтүстік-батысындағы Шэньси провинциясының астанасы Сиань қаласынан басталып, Қазақстан арқылы өтіп, Каспий теңізі арқылы Әзербайжан астанасы Баку қаласына дейін жетеді. Теміржол және теңіз бағыттарын біріктіретін бұл дәліз Еуропамен байланыс орнатудағы ең қысқа жолдардың бірі болып саналады және құрлықаралық жүк тасымалының баламалы бағыттарын әртараптандырады.
Қаңтар-наурыз айлары аралығында бұл бағытта теміржол және теңіз құрамдарын қоса алғанда 85 рейс жүзеге асырылып, өткен жылдың сәйкес кезеңімен салыстырғанда 150 пайызға артқан.
Аталған бағыт КҚытай-Еуропа теміржол экспрессі желісінің бөлігі болып табылады және «Бір белдеу, бір жол» бастамасының негізгі жобаларының бірі саналады. 2025 жылдың қазан айына дейін бұл желі шамамен 120 мың рейс орындап, 12 млн-ға жуық жиырма футтық контейнерлік баламаны (TEU) тасымалдады. Қазіргі таңда ол Еуропаның 26 еліндегі 232 қаланы және Азияның 11 еліндегі 100-ден астам қаланы қамтиды.
Алматы Транскаспий бағытының маңызды логистикалық тораптарының бірі болып табылады. Соңғы жылдары Қытай мен Қазақстанның теміржол компаниялары деректер алмасу және құжаттарды алдын ала тексеру арқылы өткізу қабілетін сұранысқа сәйкестендіріп, транзит уақытын айтарлықтай қысқартты.
Сианьнан Бакуге жеткізу уақыты өткен жылы шамамен 20 күн болса, қазіргі таңда 15 күнге дейін қысқарған, ал ең жылдам жеткізу мерзімі 11 күнді құрайды. Бұл көрсеткіш шамамен 25 пайызға жақсарғанын білдіреді.
Сиань халықаралық порты Чанба басқару комитеті Қазақстан, Әзербайжан және басқа елдердің теміржол және теңіз операторларымен ынтымақтастықты тереңдетіп, бағыттың өткізу қабілеті мен бәсекеге қабілеттілігін одан әрі арттыруды жоспарлап отыр.
Жылдам логистика бизнес үшін нақты тиімділік әкелуде. Сарапшылардың айтуынша, жеткізу мерзімінің қысқаруы экспорттың бәсекеге қабілеттілігін арттырып, тауарлардың шетелдік нарықтарға жылдамырақ жетуіне, капитал айналымының жеделдеуіне және компаниялардың сенімінің нығаюына ықпал етеді.
