Дүйсенбі күні Қытайдың оңтүстігіндегі Хайнань провинциясының әкімшілік орталығы Хайкоу қаласында Қытайдың 6-шы халықаралық тұтыну тауарлары ЭКСПО-сы /CICPE/ басталды. Бұл шара Хайнань еркін сауда порты құрылысының жарқын көрінісіне айналып, Қытай мен әлем үшін нарық мүмкіндіктерін бірлесіп пайдалануға арналған маңызды алаң ретінде танылып отыр.
13-18 сәуір аралығында өтетін іс-шараның басты тақырыбы — «Ашықтық жаһандық тұтынуды ынталандырады, инновациялар жарқын өмірге жол ашады». Сонымен қатар ЭКСПО аясында 2026 жылғы «Қытайда шоппинг» халықаралық тұтыну маусымы да басталды.
Биылғы көрменің ауқымы айтарлықтай кеңейді. Көрме алаңы 143 мың шаршы метрге жетіп, өткен жылмен салыстырғанда 13 мың шаршы метрге ұлғайды. Шетелдік экспонаттардың үлесі 65 пайызды құрап, бұл өткен жылмен салыстырғанда 20 пайыздық тармаққа артық. ЭКСПО барысында денсаулық сақтау, зергерлік бұйымдар және цифрлық технологиялар салаларында 200-ден астам жаңа өнім таныстырылады. Мұндай өнімдер саны өткен жылмен салыстырғанда екі есеге артқан.
Алғаш рет 2021 жылы өткен Қытай халықаралық тұтыну тауарлары ЭКСПО-сы трансұлттық корпорациялар үшін Қытайдың ірі тұтыну нарығындағы үрдістерді бақылауға мүмкіндік беретін маңызды платформа болып табылады. Соңғы бес жылда бұл іс-шараға әлемнің 92 елi мен өңірінен 3 800-ден астам кәсіпорын және 12 мыңнан астам бренд қатысты.
6-шы ЭКСПО-ның құрметті қонағы — Канада. Канадалық делегация құрамына косметика, ауыл шаруашылығы өнімдері, денсаулыққа арналған тауарлар және үй жануарларына арналған азық өндіретін шамамен 40 компания кірді.
Ресей мен Болгарияны қоса алғанда, бірқатар елдер алғаш рет ұлттық павильондарын ұсынды. Сонымен қатар Швейцария, Чехия және Ирландияны қоса алғанда, 12 ел мен өңір ресми делегациялар жіберіп, ағымдағы ЭКСПО-ға қатысуда.
