2026 жылдың бірінші тоқсанында Қытайдың солтүстік-батысындағы Синьцзян-Ұйғыр автономиялық ауданының сыртқы сауда айналымы өткен жылдың осы кезеңімен салыстырғанда 3,4% өсіп, 111,68 млрд юаньға (шамамен 16,4 млрд АҚШ доллары) жетті. Бұл туралы Үрімші кеденінің деректері хабарлайды.
Жергілікті кеденнің мәліметіне сәйкес, алғашқы үш айда қалыпты сауда аясындағы экспорт пен импорт көлемі жылдық есеппен 13,2% өсіп, есепті кезеңдегі жалпы сыртқы сауда айналымының 55,6% құрады. Сонымен қатар, қаңтар-наурыз айларында өңдеу негізіндегі сауда көлемі айтарлықтай өсіп, жылдық есеппен 428,1% артты.
Осы кезеңде Синьцзяндағы сыртқы саудамен айналысатын кәсіпорындар саны да көбейді. Ағымдағы жылдың наурыз айының соңындағы жағдай бойынша өңірде мұндай кәсіпорындардың жалпы саны 2 665-ке жетіп, 2025 жылдың сәйкес кезеңімен салыстырғанда 17,9% артты. Атап айтқанда, шетелдік капитал қатысатын кәсіпорындардың сыртқы сауда айналымы жылдық есеппен 323% өсті.
Синьцзянның негізгі сауда серіктестерімен, соның ішінде Орталық Азия елдері мен АСЕАН мемлекеттерімен ынтымақтастығы одан әрі тереңдеуде. Қаңтар-наурыз айларында «Бір белдеу, бір жол» бастамасына қатысушы елдермен тауар айналымы жылдық есеппен 6,3% өсіп, өңірдің жалпы сыртқы саудасының 87,8% құрады. Сонымен қатар Синьцзянның АСЕАН елдерімен саудасы 30,6% артты.
Үрімші кеденінің басшысы орынбасары Ли Цинхуа Синьцзянның сыртқы саудасының тұрақты өсімі оның бірегей географиялық артықшылықтары мен үнемі жетілдіріліп отыратын бизнес ортасының нәтижесі екенін атап өтті. Бұл өз кезегінде Қытай мен Орталық Азия елдері арасындағы сауда-экономикалық ынтымақтастықты тереңдетуге және өңірлік экономиканың ортақ өркендеуіне ықпал етуде.
