Қытайдың Шыңжаң-Ұйғыр автономиялық ауданында ауылдық жерлерде цифрлық кітап оқу белсенді дамып келеді. 2024 жылдың қыркүйегінде WeChat платформасы негізінде іске қосылған «Шыңжаңның цифрлық ауыл кітапханасы» тегін платформасы бүгінде 241 мыңнан астам тіркелген қолданушыны және 18 миллионнан астам қаралымды жинады.
Платформада қытай, ұйғыр және қазақ тілдерін қоса алғанда, алты тілде 17 мыңнан астам электронды және аудиокітап қолжетімді. Пайдаланушылар әдебиет, ауыл шаруашылығы, ғылым, денсаулық сақтау және балалар біліміне қатысты материалдарды оқи алады. Сонымен қатар онлайн оқырмандар бонустар жинап, оларды күнделікті тұрмысқа қажетті тауарларға айырбастай алады.
Жоба Шыңжаңның ауылдық өңірлерінде кітап оқуды насихаттауға бағытталған ауқымды бағдарламаның бір бөлігіне айналды. Қазіргі таңда өңірде шамамен 9 мың ауылдық кітапхана жұмыс істейді. Цифрлық технологиялардың арқасында шалғай елді мекен тұрғындары кітаптарды онлайн брондау, аудионұсқаларды пайдалану және әдебиеттерді үйге жеткізу қызметтеріне қол жеткізді.
