Қырғызстан мектеп оқушылары арасындағы «Қытай тілі көпірі» байқауының финалдық кезеңі ел астанасы Бішкекте өтті. Оған Қырғызстанның әр өңірінен келген 13 оқушы қатысты.
Іс-шара барысында сөз сөйлеген Қытайдың Қырғызстандағы елшілігінің кеңесші-уәкілі Ли Хуа Қытай мен Қырғызстан арасындағы ынтымақтастықтың қарқынды дамуына байланысты Қырғызстанда қытай тіліне деген қызығушылықтың тұрақты түрде артып келе жатқанын атап өтті. Оның айтуынша, жастардың көбі қытай тілін болашағы зор білім және кәсіби даму бағыты ретінде таңдауда. Қытай дипломаты қырғызстандық оқушыларға берілген мүмкіндіктерді бағалап, жаңа білімге ұмтылып, болашақта Қытай мен Қырғызстан достығын жалғастырушы белсенді буынға айналуға тілектестік білдірді.
Бішкек қаласы мэриясының Білім департаментінің директоры Рахат Мусаева Қырғызстан оқушылары арасында бұл байқауға деген қызығушылықтың артып келе жатқанын айтты. Оның сөзінше, байқау арқылы балалар тек тілді меңгеріп қана қоймай, Қытайдың мәдениетімен, тарихымен, салт-дәстүрлерімен де тереңірек танысуға мүмкіндік алады.
Жүсіп Баласағұн атындағы Қырғыз ұлттық университетінің ректоры Догдурбек Чонтоев қытай тілін меңгеру Қырғызстан жастары үшін кең мүмкіндіктер ашып, олардың кәсіби дағдылары мен жан-жақты біліктілігін үздіксіз жетілдіруге көмектесетінін атап өтті. Ол байқау қатысушылары Қырғызстан мен Қытай арасындағы мәдени-гуманитарлық алмасулар мен ынтымақтастықтың дамуына оң үлес қосатынына сенім білдірді.
Байқау бағдарламасына белгіленген тақырып бойынша сөз сөйлеу, өнер көрсету, сурет бойынша әңгіме құрастыру, қытай тілі, Қытай мәдениеті және Қытай туралы сұрақтарға жауап беру кезеңдері кірді. Қызу өткен сайыс қорытындысында Бішкектегі №95 мектеп-гимназиясының 8-сынып оқушысы Нурэлита Эркинбекова жеңімпаз атанды.
«Осы байқаудың арқасында мен үлкен тәжірибе жинап, қытай тілін үйренуде маңызды қадам жасадым. Мен қытай тілін әрі қарай оқып, бұдан да жоғары нәтижелерге жетемін», — деді жеңімпаз.
Іс-шараны Қытайдың Қырғызстандағы елшілігі мен Жүсіп Баласағұн атындағы Қырғыз ұлттық университеті жанындағы Конфуций институты бірлесіп ұйымдастырды.
