2026 жылы Азия-Тынық мұхиты экономикалық ынтымақтастығының (АТЭС) кездесулері мен іс-шараларын қабылдаушы тарап ретінде Қытай 18–19 мамыр күндері Шанхайда (Шығыс Қытай) АТЭС жоғары лауазымды тұлғаларының екінші кездесуін өткізуге дайын. Бұл туралы Қытай Сыртқы істер министрлігінің ресми өкілі Го Цзякунь мәлімдеді.
Ол бұл туралы ведомстволық кезекті брифинг барысында айтып, алдағы кездесуде АТЭС аясындағы биылғы жылдың алғашқы жартысындағы ынтымақтастықтың аралық қорытындылары шығарылатынын, бастапқы жетістіктер сараланып, екінші жартыжылдықта өтетін түрлі іс-шаралар мен АТЭС көшбасшыларының бейресми кездесуін табысты ұйымдастыруға негіз қаланатынын атап өтті.
Қытай дипломатының айтуынша, аталған кездесу қарсаңында АТЭС-тің бейінді комиссиялары мен жұмыс топтары 11–17 мамыр аралығында сауда және инвестициялар, экономика мен технология саласындағы ынтымақтастық, әйелдер ісі, телекоммуникациялар және азық-түлік қауіпсіздігі секілді мәселелерге арналған шамамен 40 отырыс пен кездесуді өткізуді жоспарлап отыр. «Іс-шараларға АТЭС экономикаларының, АТЭС хатшылығының және бақылаушылардың 1000-нан астам өкілі қатысады деп күтілуде», — деді Го Цзякунь.
Қытай СІМ ресми өкілі жылына төрт-бес рет өткізілетін АТЭС жоғары лауазымды тұлғаларының кездесулері АТЭС көшбасшыларының бейресми саммитінің нәтижелі қорытындыларын әзірлеудің негізгі арнасы екенін атап өтті.
Го Цзякунь қабылдаушы қала ретінде таңдалған Шанхай туралы да айтып, мегаполистің Қытайдың ең ірі экономикалық орталығы әрі жаһандық маңызды экономикалық тораптардың бірі екенін жеткізді. Оның айтуынша, экономиканың жиынтық көлемі бойынша Шанхай әлемдегі алғашқы бес қаланың қатарына кіреді, ал порттық сауда көлемі мен TEU (жиырма футтық контейнер эквиваленті) бойынша контейнер айналымы жөнінен әлемде бірінші орында тұр.
«Біз АТЭС жоғары лауазымды тұлғаларының екінші кездесуін жан-жақты жариялайтын барлық журналистерді құптаймыз, АТЭС-тегі “Қытай жылын” бақылауды жалғастырып, қолдау көрсетеді деп сенеміз», — деп түйіндеді Го Цзякунь.
