Қызмет көрсету секторын дамыту — тек қазіргі үрдістерге сай таңдау ғана емес, сонымен қатар өнеркәсіптің сұраныстары мен қоғамның қажеттіліктеріне жауап беретін маңызды қадам. Бұл туралы ҚХР Мемлекеттік даму және реформалар комитетінің өкілі Ли Чуньфан «Синьхуа» агенттігі ұйымдастырған «Қытай экономикасының дөңгелек үстелі» атты мультимедиялық пікірталас бағдарламасының соңғы шығарылымында мәлімдеді.
Ресми деректер қызмет көрсету саласының маңызы артып келе жатқанын көрсетеді. Биылғы жылдың бірінші тоқсанында оның қосылған құны елдің жалпы ішкі өнімінің 61,7 пайызын құрады, ал жалпы экономикалық өсімге қосқан үлесі 63,2 пайызға жетті. Бұл сектордың ұлттық экономиканың маңызды тірегіне айналғанын дәлелдейді.
Сәуір айында Бейжіңде қызмет көрсету саласын дамытуға арналған жалпықытайлық конференция өтті. Сонымен қатар ҚХР Мемлекеттік кеңесі қызмет көрсету саласының әлеуетін кеңейтуге және сапасын арттыруға бағытталған жетекші қағидаттарды жариялады.
Ли Чуньфан қойылған міндеттерді түсіндіру үшін бейнелі теңеу қолданды. Оның айтуынша, «бәліштің көлемін ұлғайту» сектордың өндірістік қуатын арттыру мен көлемін кеңейтуге бағытталса, «сапасын жақсарту» құрылымды оңтайландыруға және даму деңгейін көтеруге негізделген. Бұл қызмет көрсету саласын мазмұнды әрі жоғары деңгейлі етуге мүмкіндік береді.
Бизнеске арналған қызмет көрсету секторын нығайту аясында Ли Чуньфан алты басым бағытты атады: технологиялық қызметтер, заманауи логистика, бағдарламалық қамтамасыз ету және ақпараттық қызметтер, жеткізу тізбегін қаржыландыру, энергия үнемдеу мен қоршаған ортаны қорғау саласындағы қызметтер, сондай-ақ кешенді іскерлік қызметтер.
Тұтынушылық қызметтерге қатысты ҚХР Мемлекеттік кеңесі жанындағы Даму мәселелерін зерттеу орталығының Нарықтық экономика институты директорының орынбасары Лю Тао саланың сапалы, әртараптандырылған және қолжетімді дамуын қамтамасыз ету қажеттігін атап өтті. Оның пікірінше, негізгі бағыттарға сапалы тұрмыстық және бөлшек сауда қызметтерін кеңейту, ықшам аудандар деңгейінде тиімді қызмет көрсету жүйесін қалыптастыру, қарттар мен балаларға күтім көрсету қызметтерінің қолжетімділігін арттыру, денсаулық сақтау саласының кәсіби әлеуетін нығайту, сондай-ақ мәдениет, туризм және спорт салаларындағы қызмет көрсету үлгілерін жаңғырту жатады. Бұл тәжірибеге негізделген және «ақылды» дамуға сүйенетін жоғары сапалы модельге көшуге мүмкіндік береді.
«Қызмет көрсету саласындағы ашықтықтың тұрақты кеңеюі бізге әлемнің үздік тәжірибелері мен басқару тәсілдерін енгізуге, саланың кәсіби және халықаралық стандарттарын арттыруға мүмкіндік береді. Бұл сондай-ақ “Қытай қызметтері” деген ортақ атаумен танымал брендтердің жедел қалыптасуына ықпал етеді», — деді қытайлық «Роффар Элдерли Сервис Ко» компаниясы басқармасының төрайымы Чжан Чэнчэн.
