Қытайдың Huawei телекоммуникациялық компаниясы Кения мемлекеттік басқару мектебімен (KSG) цифрлық дағдыларды дамыту және Кенияның мемлекеттік секторын цифрлық трансформациялауды қолдау жөнінде өзара түсіністік туралы меморандумға қол қойды.
Huawei компаниясының мәліметінше, серіктестік мемлекеттік қызметкерлердің цифрлық құзыреттерін дамытуға, білім алмасуға және кадрлар даярлау бойынша бірлескен бағдарламаларды іске асыруға бағытталған. Бастама Кенияның мемлекеттік қызметтерді жаңғырту және заманауи цифрлық технологияларды енгізу жөніндегі ұлттық стратегиясына сәйкес келеді.
Келісім аясында жасанды интеллект пен киберқауіпсіздік секілді бағыттар бойынша бірлескен білім беру бағдарламаларын өткізу, зерттеу ынтымақтастығын дамыту және мамандар даярлау қарастырылған. Сонымен қатар тараптар жаңа технологиялардың мемлекеттік басқару жүйесіне ықпалына қатысты тәжірибе алмасу бағдарламалары мен консультациялық қолдауды дамытуды жоспарлап отыр.
KSG бас директоры Нура Мохамед Huawei компаниясымен ынтымақтастық мекемені цифрлық мемлекеттік басқару саласындағы озық тәжірибе орталығына айналдырудағы маңызды қадам болатынын айтты.
Меморандумға сәйкес, 2026–2029 жылдар аралығында Huawei 2000 мемлекеттік қызметкер мен KSG-дің 50 техникалық маманын оқытуға қолдау көрсетеді. Бағдарлама қатысушылары халықаралық сертификаттаудан өтіп, жасанды интеллект технологиялары мен мемлекеттік басқарудың қауіпсіз цифрлық жүйелерімен жұмыс істеудің практикалық дағдыларын меңгере алады.
