Қазақстан Республикасы Парламенті Мәжілісінің төрағасы Ерлан Қошановтың шақыруымен Бүкілқытайлық халық өкілдері жиналысы Тұрақты комитетінің төрағасы Чжао Лэцзи дүйсенбіден сәрсенбіге дейін Қазақстанға ресми достық сапармен келді.
Сапар барысында Чжао Лэцзи Астанада Қазақстан Президенті Қасым-Жомарт Тоқаевпен кездесті, сондай-ақ Қазақстан Парламенті Сенатының төрағасы Мәулен Әшімбаевпен және Мәжіліс төрағасы Ерлан Қошановпен келіссөздер өткізді.
Қасым-Жомарт Тоқаевпен кездесуде БХӨЖ Тұрақты комитетінің төрағасы Қытайдың Қазақстанмен бірге екі елдің түбегейлі мүдделеріне қатысты мәселелерде өзара қолдауды нығайтуға, даму стратегияларын үйлестіруге және «Бір белдеу, бір жол» бастамасы аясындағы жоғары сапалы ынтымақтастықты жалғастыруға дайын екенін мәлімдеді.
Чжао Лэцзи тараптарды инвестициялар, энергетика, пайдалы қазбаларды өндіру, өзара байланыс және басқа да салалардағы ынтымақтастықты нығайтуға шақырды. Сонымен қатар жаңа энергетика, цифрлық экономика, жасанды интеллект, трансшекаралық электрондық сауда және «ақылды» қалалар бағыттарында жаңа ынтымақтастық мүмкіндіктерін қалыптастыру қажеттігін атап өтті. Ол сондай-ақ Қытай мен Қазақстанның мәдени алмасу жылын табысты өткізу үшін бірлескен күш-жігердің маңызын айтты.
БХӨЖ Тұрақты комитетінің төрағасы Қытайдың Қазақстанмен бірге БҰҰ, Шанхай ынтымақтастық ұйымы (ШЫҰ), «Қытай – Орталық Азия» тетігі және басқа да көпжақты алаңдар аясындағы үйлестіруді күшейтуге дайын екенін білдірді. Оның айтуынша, бұл екі елдің ортақ мүдделерін және халықаралық әділеттілікті қорғауға ықпал етеді.
Өз кезегінде Қасым-Жомарт Тоқаев Қазақстан мен Қытайдың тату көрші, сенімді дос әрі стратегиялық серіктес екенін атап өтті. Ол Қазақстанның «Бір Қытай» қағидатын ұстанатынын және ҚХР Төрағасы Си Цзиньпин ұсынған адамзаттың ортақ тағдыры қауымдастығын құру тұжырымдамасы мен төрт жаһандық бастаманы қолдайтынын айтты.
Қазақстан Президенті екі елдің заң шығарушы органдары арасындағы ынтымақтастықтың үздіксіз тереңдеп келе жатқанын және оның қазақ-қытай достығын нығайтуда маңызды рөл атқаратынын атап өтті.
Мәулен Әшімбаевпен және Ерлан Қошановпен өткен келіссөздерде Чжао Лэцзи Қытай мен Қазақстанның заң шығарушы органдары арасындағы алмасулар мен ынтымақтастық екіжақты қатынастардың ажырамас бөлігі екенін айтты. Оның пікірінше, екі елдің парламенттері демократияны дамыту, заң үстемдігін қамтамасыз ету, заң шығару сапасын арттыру және басқа да бағыттар бойынша тәжірибе алмасуы қажет.
Мәулен Әшімбаев Қытайдың жаһандық тұрақтылықтың маңызды тірегіне және әлемдік экономикалық өсімнің қуатты қозғаушы күшіне айналғанын атап өтті. Оның айтуынша, Қазақстан екіжақты сауда-экономикалық және инвестициялық ынтымақтастықты дамыту үшін қолайлы жағдай жасайды.
Ерлан Қошанов Қазақстан тарапы Тайвань, Шыңжаң, Сянган және Сицзан мәселелеріндегі Қытай ұстанымын берік қолдайтынын мәлімдеп, екі елдің заң шығарушы органдары арасындағы достық байланыстарды одан әрі нығайтуға дайын екенін білдірді.
