Қытайдың солтүстік-шығысындағы Ляонин провинциясының Шэньян қаласында орналасқан BMW Brilliance зауытында бейсенбі күні 7 миллионыншы автокөлік конвейерден шықты. Бұл жетістік BMW Group компаниясының Қытай нарығына ұзақ мерзімді адалдығын көрсететін маңызды белес ретінде бағалануда.
«Біз Қытайда 30 жылдан астам уақыт бойы табысты жұмыс істеп келеміз. Шэньяндағы зауытымыздан шыққан 7 миллионыншы BMW автокөлігі — осы табысты тарихтың маңызды кезеңі. Бұл біздің жергілікті өндірістің қуатын айқын көрсетеді», — деді BMW AG компаниясының өндіріс жөніндегі басқарма мүшесі Раймонд Виттманн.
Оның айтуынша, биылғы жылдың соңында Neue Klasse («Жаңа класс») үлгілерінің жергілікті өндірісі басталып, BMW компаниясының Қытайдағы қызметінің жаңа кезеңі ашылады.
2003 жылы Қытайда шығарылған алғашқы BMW автокөлігінен бастап бүгінгі 7 миллиондық межеге дейін компания елде автокөліктер мен күштік агрегаттарды өндірудің толық циклін, жергілікті ғылыми-зерттеу және тәжірибелік-конструкторлық жұмыстарды, сондай-ақ жергілікті жеткізу тізбегін қамтитын кешенді жүйе қалыптастырды.
Компания өкілдерінің айтуынша, бұл Шэньянды BMW-дің әлемдегі ең маңызды өндірістік және инновациялық орталықтарының біріне айналдырған.
Ляонин провинциясының әкімшілік орталығы саналатын Шэньян қаласындағы кәсіпорын BMW Group-тың әлемдегі ең ірі өндірістік базасы болып табылады.
BMW Brilliance Automotive Ltd компаниясының президенті әрі бас директоры Биргит Бёмнің айтуынша, компания жоғары сапалы өнімдермен қатар, Шэньянда болашаққа бағдарланған өндірістік жүйе, мықты жергілікті құзыреттер мен инновациялар мен жетістіктердің негізіне айналған кәсіби команда қалыптастырған.
«Осы берік іргетасқа сүйене отырып, біз инновациялар, тереңірек локализация және интеллектуалды өндіріс арқылы жаңа дәуірге өтуді жеделдетіп, BMW-дің Қытайдағы дамуының келесі тарауын ашып отырмыз», — деді Биргит Бём.
