Сянган арнайы әкімшілік ауданының (АӘА) әкімшілігі басшысы Ли Цзячао 31 мамыр мен 6 маусым аралығында Қазақстан мен Өзбекстанға баратын іскерлік делегацияны бастап барады.
Сянган АӘА әкімшілігінің мәліметінше, сапардың мақсаты — Орталық Азиядағы осы екі мемлекетпен қаржы, сауда, инфрақұрылым, инновациялар, технологиялар және жасыл даму салаларындағы ынтымақтастықты нығайту. Сонымен қатар жаңа сауда дәліздерін қалыптастыру және дамушы нарықтардың мүмкіндіктерін ашу мәселелері де күн тәртібіне енгізілген.
Ли Цзячаоның айтуынша, бұл делегация оның үкіметінің қазіргі өкілеттік мерзімі ішіндегі ең ірі іскерлік миссия болып табылады. Оның құрамына Сянганнан келген 40-тан астам кәсіпкер мен түрлі сала мамандары, сондай-ақ Қытайдың құрлықтық бөлігіндегі кәсіпорындардың шамамен 30 өкілі кіреді.
Делегация мүшелері қаржы, заң қызметтері, құрылыс, машина жасау, логистика және жоғары технологиялық өндіріс салаларын таныстырады.
Әкімшілік басшысы делегацияның мақсаты Орталық Азия кәсіпорындарын Сянганның халықаралық бизнес алаңы ретіндегі артықшылықтарын пайдалануға шақыру екенін атап өтті.
Ли Цзячао сапарын Қазақстаннан бастап, 3 маусымда Өзбекстанға аттанады.
