Қытайда жасалған алғашқы ірі круиздік лайнер — Adora Magic City Шанхайдан ел тарихындағы алғашқы «ешқайда тоқтамайтын» круизге аттанды.
Жаңа туристік өнімнің ерекшелігі — кеме порттан шығып, басқа айлақтарға соқпай, қайтадан сол портқа оралады. Лайнер Усонкоу халықаралық круиздік терминалынан шығып, саяхатын толықтай теңізде өткізуде.
Үш күндік круиз жолаушыларға өзге порттарға бармай-ақ, кеменің бортында толыққанды демалуға мүмкіндік береді. Бағдарламада ойын-сауық пен сервистік қызметтерге ерекше назар аударылған. Қонақтар үшін стендап-шоулар, иллюзионистердің өнер көрсетуі, тақырыптық кештер және арнайы гастрономиялық бағдарламалар әзірленген.
Жолаушылардың айтуынша, жаңа формат ұзақ демалыс алмай-ақ және қосымша ұйымдастырушылық қиындықтарсыз теңіз саяхатына шығуға мүмкіндік береді.
Жайлылықты қамтамасыз ету мақсатында лайнердің жүктемесі оның жалпы сыйымдылығының 80 пайызымен шектелді. Жолаушылардың орташа жасы 47 жасты құрады, бұл дәстүрлі круиздік бағыттармен салыстырғанда айтарлықтай төмен көрсеткіш.
Рейс қарсаңында Шанхай билігі Қытайдағы осындай форматтағы круиздерді ұйымдастыруға алғашқы рұқсат беріп, кедендік және шекаралық бақылаудың жеңілдетілген рәсімдерін енгізді.
Шанхай қалалық көлік комиссиясының өкілі Тун Дэниннің айтуынша, «ешқайда тоқтамайтын» круиздер — демалыс пен ойын-сауықтың негізгі орны ретінде кеменің өзін ұсынатын жаңа туристік өнім.
Сала деректеріне сәйкес, Қытайдың круиздік нарығы белсенді түрде қалпына келуін жалғастыруда. 2025 жылы елдегі круиздік тасымалдар жолаушыларының жалпы саны алдыңғы жылмен салыстырғанда 25,3 пайызға өсті.
