Қытай цифрлық экономиканы дамытуға бағытталған үш жылдық іс-қимыл жоспары аясында деректер нарығын қалыптастыру және оларды жаңа өндіріс факторы ретінде қолдану саласында елеулі нәтижелерге қол жеткізді.
Бұл туралы ҚХР Ұлттық деректер басқармасының саясат және жоспарлау департаменті директорының орынбасары Луань Цзе мәлімдеді.
Оның айтуынша, соңғы екі жылда ел экономиканың тиімділігін арттыру және түрлі салаларда инновацияларды енгізу үшін деректерді пайдалану бағытында айтарлықтай ілгеріледі.
Қытай 2020 жылы деректерді жер, еңбек, капитал және технологиялармен қатар өндірістің негізгі факторларының қатарына ресми түрде енгізіп, олардың экономикалық өсім мен цифрлық трансформация үшін стратегиялық маңызын айқындады.
2023 жылы құрылған ҚХР Ұлттық деректер басқармасы цифрлық Қытайды, цифрлық экономиканы және цифрлық қоғамды дамытуға, сондай-ақ деректерді басқару мен пайдалану тетіктерін жетілдіруге жауап береді.
Үш жылдық жоспарды іске асыру аясында ведомство қазірдің өзінде 417 үлгілік тәжірибені жариялап, экономиканың 11 саласында деректерді өндіріс факторы ретінде пайдаланудың 760 сценарийін айқындады. Бұл бастапқыда жоспарланған 300-ден астам сценарий құру мақсатын едәуір асыра орындағанын көрсетеді.
Ведомствоның мәліметінше, 2025 жылы Қытайдағы белсенді деректердің жалпы көлемі 1,67 зеттабайтқа жетіп, өткен жылмен салыстырғанда 28,46 пайызға өсті. Бір зеттабайт шамамен бір триллион гигабайт ақпаратқа тең.
Деректерді өңдеу және пайдалану саласына қатысты корпоративтік өнімдер мен қызметтердің саны бір жыл ішінде 29,29 пайызға артты, ал осы нарықтағы мәмілелер көлемі 39,8 пайызға өсті.
Ұлттық деректер басқармасының пікірінше, реттеуді одан әрі жетілдіру, деректерді қолданудың практикалық сценарийлерін кеңейту және цифрлық экономика инфрақұрылымын дамыту деректердің әлеуетін тиімдірек ашуға және олардың Қытайдың жоғары сапалы дамуының негізгі факторларының бірі ретіндегі рөлін күшейтуге ықпал етеді.
