Дүниежүзілік банк Бейжіңде Қытай экономикасына арналған кезекті баяндамасын жариялап, сұраныс пен ұсыныс арасындағы теңгерімсіздік пен әлемдік энергия тасымалдаушылар жеткізіліміне қатысты тұрақсыздық сақталғанына қарамастан, ел экономикасының тұрақты өсіп отырғанын атап өтті.
Баяндамаға сәйкес, 2026 жылдың басында экономикалық өсімнің негізгі факторлары технологиялық секторға салынған жоғары инвестициялар мен экспорттың белсенді өсуі болды. Екінші тоқсанда экономиканы мемлекеттік қолдау, жоғары технологиялық салалардың одан әрі дамуы және сыртқы энергетикалық тәуекелдерге тәуелділікті азайтуға бағытталған шаралар ішкі сұраныстың әлсіреуін ішінара өтеді. Сонымен қатар Дүниежүзілік банк сарапшылары әлемдік энергетикалық нарықтар мен мұнай бағасының құбылмалылығы сақталғанымен, жалпы экономика үшін тәуекелдер теңгерімді күйде қалып отырғанын атап өтті.
Дүниежүзілік банктің Қытай, Моңғолия және Корея Республикасы бойынша бөлімшесінің директоры Татьяна Проскурякова әлеуметтік қорғау жүйесін одан әрі нығайту ішкі тұтынудың өсуіне маңызды серпін бере алатынын айтты. Оның пікірінше, әлеуметтік төлемдермен қамтуды, оның ішінде икемді жұмыспен қамту нысандарында еңбек ететін қызметкерлерді қамтуды кеңейту және оларды тағайындау тетіктерін жетілдіру үй шаруашылықтарының сенімін арттырып, «қара күнге» жиналатын жинақ көлемін азайтуы мүмкін.
Баяндама авторлары сондай-ақ Қытайда «жасыл» құзыреттері мен жүйелі ойлау, бейімделіп оқу қабілеті және цифрлық дағдылар сияқты әмбебап машықтарға ие мамандарға сұраныстың артып келе жатқанын атап өтті. Дүниежүзілік банктің Қытай бойынша жетекші экономисі Элитса Милевтің айтуынша, төмен көміртекті экономикаға көшу жаңа жұмыс орындарының ашылуына ықпал етеді, ал кәсіби даярлықты дамыту, «жасыл» дағдыларды сертификаттау және әлеуметтік қорғау жүйесін жетілдіру бұл үдерісті барынша бірқалыпты әрі инклюзивті етуге мүмкіндік береді.
