Қытай мен Солтүстік Еуропаның төрт елі жасанды интеллектті жаһандық басқару мәселелері бойынша диалогты жандандырып, осы саладағы халықаралық қағидаларды қалыптастыру тәсілдерін бірлесіп зерделеуге келісті. Бұл туралы Қытай Сыртқы істер министрлігінің ресми өкілі Мао Нин Қытай Сыртқы істер министрі Ван Идің Дания, Швеция, Финляндия және Норвегияға жасаған сапарының қорытындысын жариялау барысында мәлімдеді.
Дипломаттың айтуынша, Қытай мен Скандинавия елдері жасанды интеллект технологияларын дамытуға және оларды реттеу мәселелеріне ерекше мән береді. Солтүстік Еуропа елдері Қытай ұсынған адамға бағдарланған тәсілге, технологияларды қоғам игілігі үшін пайдалануға, әділдікке, инклюзивтілікке және бірлескен басқаруға негізделген жасанды интеллектті дамыту қағидаттарына оң баға берді.
Сапар барысында Ван И төрт елдің сыртқы істер министрлерімен келіссөздер жүргізіп, мемлекет басшыларымен кездесті. Тараптар саяси диалогты кеңейтуге, стратегиялық өзара іс-қимылды нығайтуға және түрлі салалардағы ынтымақтастықты дамытуға ниетті екенін растады.
Қытай сондай-ақ ғылыми-технологиялық және инвестициялық ынтымақтастықты кеңейтуге мүдделі екенін білдірді. Ван И Солтүстік Еуропа елдерінің компанияларын әлемдегі ең ірі тұтыну нарығының, дамыған өнеркәсіптік базаның және жаңа технологияларды қолданудың кең мүмкіндіктерін пайдалана отырып, Қытай нарығында белсендірек жұмыс істеуге шақырды. Бұдан бөлек, тараптар Қытай мен Еуропа арасындағы экономикалық диалогты нығайтуға, сауда келіспеушіліктерін келіссөздер арқылы шешуге және өзара тиімді шешімдер іздеуге қолдау білдірді.
Мао Ниннің айтуынша, Қытай мен Солтүстік Еуропа мемлекеттері көпжақты институттар аясындағы ынтымақтастықты кеңейтуге, БҰҰ-ның жетекші рөлін қолдауға және жаһандық басқарудың неғұрлым әділ әрі инклюзивті жүйесін қалыптастыруға жәрдемдесуге уағдаласты.
