Қытайдағы зияткерлік энергетиканың қарқынды дамуы жасанды интеллект пен цифрлық технологиялардың әлемдік энергетика саласына кеңінен енгізілуі жағдайында халықаралық ынтымақтастық үшін жаңа мүмкіндіктер ашуда. Мұндай қорытындыға Чэнду қаласында өткен 2026 жылғы Қытайдың зияткерлік энергетика жөніндегі конференциясына қатысушылар келді.
Қытай энергетикалық зерттеулер қоғамының төрағасы Ши Юбоның айтуынша, елдегі зияткерлік энергетика саласы тәжірибелік жобалар кезеңінен ауқымды коммерциялық қолдану кезеңіне өтті. Жасанды интеллект жаңартылатын энергия көздерінен өндірілетін электр энергиясын болжау үшін пайдаланылады, ал цифрлық технологиялар энергия өндіруден бастап оны тасымалдау, бөлу және тұтынуға дейінгі бүкіл өндірістік тізбекті қамтиды.
Таза энергетика саласындағы әлемдік көшбасшы саналатын Қытай цифрлық технологияларды энергетикалық жүйеге белсенді түрде енгізіп, электр энергиясын өндіруді, тасымалдауды, бөлуді және тұтынуды біріктіретін бірыңғай зияткерлік экожүйе қалыптастыруда.
Конференцияға қатысушылар Қытай тәжірибесінің көптеген елдер үшін қызығушылық тудыратынын атап өтті. Таулы өңірлерді кешенді дамыту жөніндегі халықаралық орталықтың (ICIMOD) аға экономисі Хуссейн Абидтің айтуынша, Қытай энергетика саласына жасанды интеллект енгізу деңгейі бойынша көптеген мемлекеттерден айтарлықтай озып тұр. Оның пікірінше, жаңартылатын энергия көздерінің үлесі жоғары елдер үшін зияткерлік энергетикалық жүйелер мен цифрлық шешімдер ерекше маңызды бола түсуде.
Жаһандық энергетикалық өзара іс-қимыл және ынтымақтастық ұйымының (GDA) зерттеуіне сәйкес, Қытай энергетикалық технологиялардағы инновациялар деңгейі бойынша әлемде бірінші орында тұр. Сондай-ақ ел таза энергетика қуатының ең ірі көлеміне ие және энергетика саласының жалпы даму деңгейі бойынша әлемдік көшбасшылардың қатарына кіреді.
Саланы дамыту мемлекеттік саясатпен қолдау табуда. Мамыр айында Қытай билігі жасанды интеллект пен энергетиканы ықпалдастыру жөніндегі іс-қимыл жоспарын таныстырды. Құжатқа сәйкес, 2030 жылға қарай жасанды интеллект инфрақұрылымын энергиямен қамтамасыз ететін таза энергетика нысандарының қуаты айтарлықтай ұлғайып, энергетика секторында жасанды интеллектті қолдану ауқымы кеңейеді.
Қытайлық шешімдер дамушы елдердің де қызығушылығын тудыруда. Индонезиядағы UMG IdeaLab зертханасының өкілі Киви Аливарганың айтуынша, Қытайда әзірленген цифрлық платформалар, энергияны басқару жүйелері мен жасанды интеллект технологиялары Индонезияның энергетикалық трансформациясында маңызды рөл атқара алады.
Форумға қатысушылар ынтымақтастықтың болашағы тек жабдық жеткізумен шектелмейтінін де атап өтті. ESG Nexus консорциумының жаһандық технологиялық инновациялар жөніндегі директоры Асад Махмуд қытайлық серіктестермен жаңа технологияларды бірлесіп әзірлеуге және өндіруге қызығушылық білдірді.
Сарапшылардың пікірінше, әлемдік энергетиканың цифрлық трансформациясы тереңдеген сайын халықаралық ынтымақтастық бірлескен инновацияларға, технологиялар алмасуға және өзара іс-қимылдың жаңа үлгілерін дамытуға көбірек негізделетін болады. Қытайдың зияткерлік энергетикалық жүйені қалыптастыру тәжірибесі «жасыл» трансформация бағдарламаларын жүзеге асырып жатқан елдер үшін маңызды бағдар бола алады.
