Қытай 2030 жылдың соңына қарай тұтыну тауарларының жылдық бөлшек сауда көлемін шамамен 60 трлн юаньға (шамамен 8,8 трлн АҚШ доллары) жеткізуді жоспарлап отыр. Бұл мақсат Қытай Мемлекеттік кеңесі бекіткен 15-бесжылдық (2026–2030 жылдар) кезеңінде ішкі тұтынуды кеңейту жоспарына енгізілген.
Құжатта ішкі тұтынудың экономикалық өсудің негізгі қозғаушы күштерінің бірі ретіндегі рөлін одан әрі күшейту көзделген. Жоспарға сәйкес, жалпы ішкі өнім құрылымындағы түпкілікті тұтынудың үлесін арттыру, тауарлар мен қызметтерге сұраныстың тұрақты өсуін қамтамасыз ету, тұтыну құрылымын жетілдіру, сапалы тауарлар мен қызметтердің ұсынысын кеңейту және тұтыну ортасын жақсарту жоспарланып отыр.
Билік 14-бесжылдық (2021–2025 жылдар) кезеңінде Қытайдың тұтыну нарығы елеулі нәтижелерге қол жеткізгенін атап өтті. 2025 жылы бөлшек сауда көлемі алғаш рет 50 трлн юаньнан асып, 50,1 трлн юаньға жетті. Ал осы кезеңде түпкілікті тұтынудың елдің экономикалық өсіміне қосқан орташа үлесі 58,8 пайызды құрап, алдыңғы бесжылдықпен салыстырғанда 10 пайыздық тармаққа жоғары болды.
Қытай Мемлекеттік кеңесінің бағалауынша, алдағы жылдары тұтыну нарығы көлемнің ұлғаюы мен сапаның жақсаруын қатар қамтитын жаңа даму кезеңіне өтеді. Бұған халықтың сатып алу қабілетінің артуы, тұтыну деңгейінің өсуі, сауда мен қызмет көрсету саласының жаңа форматтарының қарқынды дамуы ықпал етеді.
Алға қойылған мақсаттарға қол жеткізу үшін ішкі сұранысты кеңейту, қызмет көрсету саласындағы тұтынуды ынталандыру, тұтыну тауарларының сапасын арттыру, бизнестің жаңа үлгілерін қалыптастыру және мемлекеттік қолдау жүйесін жетілдіру жөніндегі шаралар қарастырылған. Сонымен қатар тұтынуды ынталандырудың ұзақ мерзімді тетігін қалыптастыруға және іскерлік әрі тұтынушылық ортаны одан әрі жақсартуға ерекше көңіл бөлінеді.
Мемлекеттік кеңес өңірлік билік органдарына ішкі тұтынуды кеңейтуді 15-бесжылдық кезеңіндегі әлеуметтік-экономикалық дамудың басым міндеттерінің қатарына енгізіп, әр өңірдің ерекшелігін ескере отырып, жоспарланған шаралардың орындалуын қамтамасыз етуді тапсырды.
