Камбоджаның ұлттық әуе тасымалдаушысы Air Cambodia қытайлық Commercial Aircraft Corporation of China (COMAC) компаниясымен 20 C909 өңірлік жолаушылар ұшағын сатып алу туралы келісімге қол қойды. Бұл шетелдік әуе компаниясы жасаған осы үлгідегі ұшақтарға берілген алғашқы ірі халықаралық тапсырыс болды.
Келісімге сәйкес, ұшақтардың алғашқы партиясы 2026 жылдың екінші жартысында жеткізіледі. Осыдан кейін олар коммерциялық пайдалануға беріледі. Сарапшылардың пікірінше, жаңа әуе кемелері Air Cambodiaкомпаниясына бағыттар желісін кеңейтуге, тасымалдау мүмкіндігін арттыруға және Камбоджаның өңір елдерімен көлік байланысын жақсартуға мүмкіндік береді.
Сонымен қатар COMAC пен Камбоджаның Азаматтық авиация жөніндегі мемлекеттік хатшылығы авиациялық қауіпсіздік, ұшу жарамдылығын сертификаттау және авиация мамандарын даярлау салаларындағы ынтымақтастықты көздейтін өзара түсіністік туралы меморандумға қол қойды. Құжат тараптар арасындағы әріптестікті одан әрі дамытуға және қытайлық авиациялық техниканы пайдалануды қолдауға бағытталған.
Бұрын ARJ21 атауымен белгілі болған C909 ұшағы 78-ден 97-ге дейін жолаушы тасымалдауға арналған және 2225-тен 3700 шақырымға дейінгі қашықтыққа ұша алады. Әуе кемесі қысқа әрі тар ұшу-қону жолақтары бар әуежайларда пайдалануға бейімделген және биік таулы аймақтарда, ыстық климат жағдайында әрі күшті бүйір жел кезінде өзінің тиімділігін дәлелдеген.
2023 жылы Индонезияда халықаралық пайдалануға енгізілгеннен кейін C909 ұшақтарының географиясы едәуір кеңейді. Қазіргі уақытта олар Лаос пен Вьетнамда да пайдаланылып, шетелдегі 28 қалаға рейстер орындайды. COMAC мәліметінше, бұл үлгідегі ұшақтар бүгінде 1 миллионнан астам жолаушы тасымалдаған. Қытайдың ішкі нарығында C909 өңірлік реактивті ұшақтар паркінің шамамен 70 пайызын құрайды. Елдегі жолаушылар әуе тасымалының тұрақты өсуі отандық өндірістегі ұшақтарға деген жоғары сұранысты сақтап отыр.
