Air China әуе компаниясы Бейжің мен Бішкек арасында тікелей әуе қатынасын ресми түрде ашты. Бейжің астаналық халықаралық әуежайынан ұшып шыққан алғашқы CA893 рейсі «Манас» халықаралық әуежайына сәтті қонып, Қытай мен Қырғызстан астаналары арасындағы тұрақты әуе қатынасының басталғанын білдірді.
Жаңа бағыттың ашылу рәсімінде Қытайдың Қырғызстандағы елшісі Лю Цзяньпин жаңа рейстің іске қосылуы екіжақты қарым-қатынасты дамытудағы маңызды қадам екенін атап өтті. Оның айтуынша, тікелей әуе қатынасы азаматтардың сапарын едәуір жеңілдетіп, сауда-экономикалық ынтымақтастықтың, инвестициялық байланыстардың және гуманитарлық алмасудың кеңеюіне ықпал етеді. Сондай-ақ бұл жоба «Бір белдеу, бір жол»бастамасы аясындағы екі елдің табысты өзара іс-қимылының тағы бір жарқын үлгісі болмақ.
«Қырғызстан әуежайлары» ашық акционерлік қоғамының операциялар және өндіріс жөніндегі директоры Жалын Бримқұлов жаңа бағыт екі ел арасындағы сапарларды анағұрлым ыңғайлы әрі жылдам ететінін, сондай-ақ Қырғызстан мен Қытай арасындағы экономикалық және іскерлік байланыстардың одан әрі дамуына серпін беретінін айтты.
Air China компаниясының мәліметінше, Бейжің – Бішкек – Бейжің бағыты бойынша тұрақты рейстер аптасына үш рет – дүйсенбі, жұма және жексенбі күндері орындалады. Бейжіңнен Бішкекке дейінгі ұшу ұзақтығы шамамен 5 сағат 40 минут, ал кері бағыттағы рейс 4 сағат 50 минутқа созылады.
