Қытайдың China Southern Airlines әуе компаниясы мен Өзбекстанның ұлттық әуе тасымалдаушысы Uzbekistan Airways код-шеринг туралы келісімге қол қойды. Бұл құжат екі ел арасындағы әуе қатынасының мүмкіндіктерін кеңейтеді.
Келісімге сәйкес, тараптар Бейжің, Гуанчжоу, Үрімші және Ташкент арасындағы рейстерге, сондай-ақ Uzbekistan Airways әуе компаниясының Ташкенттен Бейжіңге, Гуанчжоуға, Үрімшіге және Ханчжоуға қатынайтын бағыттарына билеттерді бірлесіп сататын болады. Екі әуе компаниясының жолаушылары серіктес рейстерге үйреншікті брондау жүйелері арқылы билет рәсімдей алады.
China Southern Airlines компаниясының мәліметінше, бұл келісім маршруттық желіні нығайтып, Қытай мен Өзбекстан арасындағы экономикалық ынтымақтастықтың дамуына ықпал етеді. Ал Uzbekistan Airways өкілдері биыл мамыр айында Ташкент – Гуанчжоу бағыты ашылғаннан кейін Қытайға ұшуға деген сұраныстың жоғары деңгейде сақталып отырғанын атап өтті. Олардың айтуынша, жаңа серіктестік жолаушыларға сапарлау мүмкіндігін кеңейтіп, екі ел арасындағы туризмнің, іскерлік және мәдени байланыстардың дамуына серпін береді.
