ОПЕК+ кеңейтілген форматына кіретін жеті ел қыркүйек айында мұнай өндірудің ең жоғары деңгейін тамыз айымен салыстырғанда тәулігіне 188 мың баррельге арттыру туралы келісімге келді. Бұл туралы ОПЕК+ онлайн отырысының қорытындысы бойынша жарияланған мәлімдемеде айтылды.
Шешім Сауд Арабиясы, Ресей, Ирак, Кувейт, Қазақстан, Алжир және Оман қатысқан кездесуден кейін жарияланды. Жиында әлемдік мұнай нарығындағы қазіргі жағдай мен даму үрдістері талқыланды. ОПЕК+ құрамына ОПЕК-ке мүше мемлекеттер және олардың серіктестері кіреді.
Мәлімдемеде айтылғандай, мұнай нарығының тұрақтылығын қолдау жөніндегі ұжымдық міндеттемелер аясында жеті ел 2023 жылғы сәуірде жарияланып, кейін 2026 жылдың соңына дейін ұзартылған тәулігіне 1,65 млн баррель көлеміндегі ерікті қысқартудан біртіндеп бас тарту саясатын жалғастыра отырып, өндіру көлемін ұлғайту туралы шешім қабылдады.
Жексенбі күні қабылданған бұл шешім ОПЕК+ елдерінің мұнай өндіру көлемін қатарынан алтыншы ай ұлғайтуы болды.
Мәлімдемеге сәйкес, жеті мемлекет нарықтағы жағдайдың өзгеруіне қарай мұнай өндіру көлемін икемді түрде реттеп отырады. Ұйымның келесі отырысы қазан айындағы өндіру деңгейін айқындау үшін 6 қыркүйекке жоспарланған.
