Қытайдың электр автобустары Әзербайжанның қоғамдық көлік жүйесін жаңғыртудың маңызды бөлігіне айналып келеді. Жаңа көліктер жолаушылар үшін жайлылықты арттырып қана қоймай, зиянды шығарындыларды азайтуға және экологиялық таза көлік өндірісін дамытуға ықпал етуде.
2024 жылы Бакуде өткен БҰҰ-ның COP29 климаттық конференциясы қарсаңында қала бағыттарына Қытайдың BYD компаниясы шығарған 160 электр автобусы шығарылды. Әзербайжанның жерүсті көлігі агенттігінің мәліметінше, бүгінде ел астанасында осындай 300-ден астам автобус күн сайын қатынайды.
Жүргізушілердің айтуынша, жаңа электр автобустарының жүрісі бірқалыпты, шу деңгейі төмен әрі жолаушылар үшін жайлы. BYD компаниясының бағалауынша, жылына шамамен 90 мың шақырым жүретін бір электр автобусы 27 мың литрге жуық дизель отынын үнемдеп, көмірқышқыл газының шығарындыларын жыл сайын шамамен 66 тоннаға қысқартуға мүмкіндік береді.
Электр автобустарының бір бөлігі Әзербайжанның Сумгаит индустриялық паркінде орналасқан Azerbaijan Energy Automotive Factory (AEAF) зауытында құрастырылуда. Кәсіпорын Әзербайжанның Бизнесті дамыту қоры, SARDA компаниялар тобы және Қытайдың BYD компаниясы арасындағы ынтымақтастық аясында құрылған. Жергілікті жерде құрастырылған алғашқы электр автобусы тапсырыс берушіге 2025 жылдың қыркүйегінде тапсырылды, ал бүгінге дейін зауыт 300 автобус шығарды.
Өндірісті іске қосуға, қызметкерлерді оқытуға және сапаны бақылау жүйесін ұйымдастыруға қытайлық мамандар белсенді қатысты. Осы жобаның арқасында жергілікті инженерлер мен жұмысшылар электр көлігін өндіру және заманауи автомобиль технологиялары саласында жаңа тәжірибе мен дағдыларға ие болды.
Әзербайжан Экономика министрлігінің мәліметінше, қытайлық компаниялармен ынтымақтастық елге экологиялық таза технологияларды импорттаумен қатар, өзінің өндірістік әлеуетін дамытуға мүмкіндік беруде. Болашақта Әзербайжан аккумуляторлық технологиялар, зарядтау инфрақұрылымы, интеллектуалды көлік жүйелері және «жасыл» экономиканың басқа да бағыттары бойынша Қытаймен ынтымақтастықты кеңейтуді жоспарлап отыр.
