Бейжіңде адамтектес роботтардың екінші Дүниежүзілік ойындары ашылды. Оған 16 елден 666 команда және 2 056 робот қатысуда. Бес күн бойы қатысушылар «Мұзды таспа» ұлттық конькимен жүгіру стадионында 51 дисциплина бойынша сынға түседі, деп хабарлайды «Синьхуа» агенттігі.
Ашылу салтанатына бір мезгілде мыңға жуық гуманоид робот қатысып, заманауи технологиялардың мүмкіндіктерін көрсетті. Биыл ұйымдастырушылар әзірлемелерді іс жүзінде қолдануға ерекше назар аударған. Сынақтардың бір бөлігі имитациялық алаңдардан нақты нысандарға — зауыттарға, қонақүйлер мен демонстрациялық үйлерге көшірілді. Осылайша әзірлеушілер адамтектес роботтардың көрнекі көрсетілімдерден нақты өндірістік және тұрмыстық міндеттерді орындауға қаншалықты дайын екенін көрсетуді көздейді.
Ойындар технологиялық алмасуды, өнеркәсіптік ынтымақтастықты және физикалық ортада әрекет ететін жасанды интеллектіні дамытуға бағытталған. Оларды Бейжің үкіметі, China Media Group, Робототехника саласындағы ынтымақтастық жөніндегі дүниежүзілік ұйым және Азия-Тынық мұхиты аймағындағы робототехникадан Әлем кубогының халықаралық кеңесі ұйымдастырды.
Бір жылдың ішінде жарыстың ауқымы айтарлықтай кеңейді. Адамтектес роботтардың алғашқы Дүниежүзілік ойындары 2025 жылғы тамызда өтіп, оған 16 елден 280 команда мен 500-ден астам робот қатысқан еді. Биыл командалар саны екі еседен астам, ал қатысушы роботтар саны шамамен төрт есе артты.
