Макао халықаралық әуежайы Гуандун провинциясының Чжухай қаласындағы көршілес Хэнцзинь аралында жүктерді өңдеу және паллеттерге орналастыру жөніндегі пилоттық жобаны іске қосты. Жоба Макао әуежайының логистикалық инфрақұрылымын іс жүзінде Қытайдың құрлықтық бөлігіне дейін кеңейтетін жаңа жүк терминалының бір бөлігіне айналады, деп хабарлайды «Синьхуа» агенттігі.
Жаңа терминал әуежайдан шамамен 13 шақырым жерде салынып жатыр. Оның аумағы шамамен 97,6 мың шаршы метрді құрайды. Мұнда құрлықтық Қытайдан Макао арқылы шетелдік нарықтарға жөнелтілетін тауарлар тексеріліп, паллеттерге орналастырылады. Құрылысты 2026 жылдың соңына дейін аяқтап, нысанды 2027 жылдың бірінші жартысында пайдалануға беру жоспарланып отыр.
Пилоттық жоба аясында Хэнцзиньде электрондық сауда тауарлары мен күнделікті тұтынатын өнімдердің, соның ішінде ойыншықтар мен сағаттардың алғашқы партиясы өңделді. Содан кейін жүк Хэнцзинь порты арқылы Макао әуежайына жеткізіліп, одан әрі Малайзия мен Филиппинге жөнелтілді.
Жобалық қуатына шыққаннан кейін терминал жылына 300 мың тоннаға дейін жүк өңдей алады. Бұл Макао әуежайының қазіргі жылдық жүк өткізу мүмкіндігінен шамамен үш есе көп. Жоба құрлықтық Қытай мен Макао арасындағы жүк тасымалын жеңілдетіп, өңірдің халықаралық логистикалық тізбектердегі рөлін күшейтуге мүмкіндік береді.
